Latviya seymi (parlamenti) deputatlarga idora binosida rus tilidan foydalanishni taqiqlovchi va ularni latish tilida so‘zlashga majburlovchi o‘zgartishlarni qabul qildi. Bu haqda LSM portali xabar berdi.
Parlament binosida deputatlar faqat davlat tili — latish tilidan foydalanishlari shart. Yangi qoidalar deputatlarning o‘zaro muloqotiga ham, fuqarolar bilan aloqasiga ham tegishlidir.
Ta’kidlanishicha, Seym binolarida boshqa tillardan foydalanish qonunbuzarlik sifatida baholanadi.
Shuningdek, o‘zgartirishga ko‘ra til qoidasidan tashqari, hujjat deputatlarning parlament komissiyalari majlislarida favqulodda vaziyatlar yoki boshqa alohida holatlarda masofadan turib ishtirok etish imkoniyatini nazarda tutadi. Bunday ishtirok etish komissiya raisi bilan oldindan kelishilgan bo‘lishi lozim. Raisning o‘zi majlisda shaxsan qatnashishi shart.
Shuningdek, qonunga deputatlarni jinoiy javobgarlikka tortish bo‘yicha aniqliklar kiritildi. Xususan, agar jinoiy ish deputat o‘z lavozimiga kirishidan oldin boshlangan bo‘lsa ham, endi jinoiy ta’qibni davom ettirish uchun Seymning roziligi talab qilinadi.
Bundan tashqari, Latviya hukumati Rossiyaning barcha Telegram kanallarini bloklashni istayotgani ma’lum bo‘ldi. Ular bu choraning respublika hududida rus tilining tarqalishiga qarshi kurashish zarurati bilan izohlamoqdalar.
Izoh (0)