Daniya poytaxti Kopengagen 17-iyun kuni e’lon qilingan “2025-yilda dunyoning yashash uchun eng yaxshi bo‘lgan shaharlari reytingi”da birinchi o‘rinni egalladi. Bu haqda CNN xabar berdi.
Avstriya poytaxti Vena Economist Intelligence Unit (EIU) yillik reytingida uch yillik birinchilikdan so‘ng Kopengagen tomonidan ortda qoldirilgan. The Economist jurnalining sho‘ba tashkiloti bo‘lgan EIU sog‘liqni saqlash, ta’lim, barqarorlik, infratuzilma va atrof-muhit kabi bir qator omillar bo‘yicha dunyoning 173 ta shahrini reytingga kiritgan.
Barqarorlik, ta’lim va infratuzilma bo‘yicha mukammal ball olgan Kopengagen birinchilikni qo‘lga kiritgan. Vena esa Shveysariyaning Syurix shahri bilan ikkinchi va uchinchi o‘rinlarni egallagan. Avstraliyaning Melburn shahri to‘rtinchi o‘ringa loyiq ko‘rilgan, Shveysariyaning Jeneva shahri esa ro‘yxatda beshinchi o‘rinni zabt etgan.
Avstraliyaning Sidney shahri oltinchi o‘ringa loyiq ko‘rilgan. Yaponiyaning Osaka shahri yettinchi, Yangi Zelandiyaning Oklend shahri esa sakkizinchi o‘rinni qo‘lga kiritgan. To‘qqizinchi o‘rinda Avstraliyaning Adelaida shahri bo‘lib, Kanadaning Vankuver shahri kuchli o‘ntalikni yakunlab bergan.
Xo‘sh, nega bu yil Vena birinchi o‘rinni olmadi?
Vena aksariyat yo‘nalishlarda yaxshi ball to‘plagan bo‘lsa-da, barqarorlik yo‘nalishida uning bahosi sezilarli darajada past bo‘lgan. Kopengagen esa barcha jabhalarda yuqori ball to‘plagan. Venadagi barqarorlik ko‘rsatkichining keskin pasayishiga 2024-yilning yozida Teylor Sviftning konsertidagi bomba tahdidi sabab bo‘lgan. O‘shanda konsert bekor qilingan edi.
2024-yilda beshinchi o‘rinni egallagan Kalgari bu yil mamlakat sog‘liqni saqlash tizimidagi “zo‘riqish” tufayli Kanadaning uchta shahri qatorida sog‘liqni saqlash bo‘yicha pastroq ball olib, 18-o‘ringa tushib ketgan. Toronto ham bu yil pastroq o‘rinni egalladi, natijada 12-o‘rindan 16-o‘ringa tushib qolgan.
O‘zbekiston poytaxti Toshkent reytingning eng quyi pog‘onalarida qayd etilgan. U 100 ballik tizimda 50-60 oralig‘ida ball to‘plagan.
2025-yilning Global yashash imkoniyati indeksi: Top 10
- Kopengagen, Daniya
- Vena, Avstriya
- Syurix, Shveysariya
- Melburn, Avstraliya
- Jeneva, Shveysariya
- Sidney, Avstraliya
- Osaka, Yaponiya
- Oklend, Yangi Zelandiya
- Adelaida, Avstraliya
- Vankuver, Kanada
Izoh (0)