“AQSH bizning yadroviy davlat maqomimizni tan olishi lozim” — KXDR rahbarining singlisi

Shimoliy Koreya yetakchisi Kim Chen Inning singlisi Kim Yo Jong AQSHdan mamlakatining yadroviy davlat sifatidagi “kechib bo‘lmas” maqomini tan olishni talab qildi. Bu haqda mahalliy nashrlarga tayanib, Al Jazeera xabar berdi.

Kim Yo Jongning ta’kidlashicha, muloqotlar hech qachon Pxenyanning yadro qurollaridan voz kechishiga olib kelmaydi.

“Pxenyan kuchli yadroviy vositalarga ega davlat sifatida sobit turibdi. Buni rad etishga urinishlar Shimoliy Koreya xalqining irodasiga qarshi chiqish bo‘ladi va qat’iyan rad etiladi. Yadro qurollaridan voz kechish endi kun tartibida emas”, degan u.

Uning ta’kidlashicha, hozirgi geopolitik vaziyat va mamlakat qudrati tubdan o‘zgargan, va bu barcha kelajakdagi qarorlar uchun asos bo‘lishi lozim.

Shimoliy Koreya tashviqot bo‘limiga rahbarlik qiluvchi Kim Yo Jong AQSH bilan doimiy qarama-qarshilik na Pxenyan, na Vashingtonga foyda keltirishini ta’kidladi. U AQSHni yangi yondashuv asosida muloqot qilishga chaqirdi.

Yo Jong, shuningdek, Kim Chen In bilan AQSH prezidenti Donald Tramp o‘rtasidagi munosabatlar “yomon emas”ligini aytib o‘tgan. Biroq bu yadro quroli ishlab chiqarishga to‘sqinlik qilmasligi ta’kidlanib, yadrosizlantirishga qaratilgan harakatlar “masxaralash” sifatida qabul qilinishi aytilgan.

“Agar AQSH real vaziyatni tan olmasa, Shimoliy Koreya bilan yangi uchrashuv faqatgina Vashingtonning umidi bo‘lib qoladi”, deya qo‘shimcha qilgan Kim Yo Jong.

Tramp yangi muloqotga tayyormi?

Ma’lumki, Tramp 2018-2019-yillarda Kim Chen In bilan 3 marta uchrashgan — Singapur, Vyetnam va Janubiy Koreya chegarasida. Garchi bu tarixiy uchrashuvlar e’tiborga loyiq bo‘lsa-da, Pxenyan yadro dasturini to‘xtatmagan. Iyun oyida Oq uy matbuot kotibi Karolin Leavit Tramp Singapurdagi muloqot asosida muzokaralarni davom ettirish niyatida ekanini bildirgandi.

Mutaxassislar: yangi muzokaralar o‘tkazilishi mumkin, lekin shartlar o‘zgargan

AQSHdagi Stimson markazi Koreya dasturi direktori Jenni Taun shunday dedi:

“Denuklearizatsiya bo‘yicha eski gaplar endi dolzarb emas. 2019-yildan beri juda ko‘p narsa — yadro qurollarini rivojlantirish, qonunchilik, siyosatdagi o‘zgarishlar va global geopolitik fon — o‘zgardi”.

Unga ko‘ra, agar muzokaralar qayta tiklansa, bu safar ular yadrosizlantirishga emas, boshqa formatdagi muloqotga asoslangan bo‘ladi.