Dunyoning 4 ta eng yirik ommaviy axborot vositalari, jumladan BBC, AFP, The Associated Press va Reuters G‘azoda hukm surayotgan vaziyat bo‘yicha qo‘shma bayonot e’lon qilib, sektordagi jurnalistlarning juda og‘ir sharoitlarda yashayotganidan jiddiy xavotir bildirdi. Bu haqda The Guardian xabar berdi.
OAVning ta’kidlashicha, G‘azo sektorida faoliyat yuritayotgan jurnalistlar nafaqat oilalarini, balki o‘zlarin ham boqa olmayapti.
Isroil xalqaro muxbirlarga anklavga kirishni taqiqlagani sababli, urush zonasida faqatgina blokadada qolib ketgan va falastinlik jurnalistlar faoliyat olib borayotgan edi.
Axborot agentliklari bir necha oydan beri Isroil rasmiylaridan jurnalistlarning G‘azoga kirish va chiqishiga erkinlik berishini so‘rab keladi. Ammo so‘nggi haftalarda nashrlar rahbariyatlari urushni yoritishga urinayotgan ba’zi jurnalistlarning jismoniy holatidan jiddiy xavotirga tushgan. Xususan, shu haftada Fransiyaning AFP agentligi Isroildan jurnalistlar va ularning oilalarini zudlik bilan hududdan evakuatsiya qilishga ruxsat so‘ragandi.
“To‘qnashuvlarda bir qancha jurnalistlarimiz halok bo‘ldi, ba’zilari jarohat oldi, boshqalari esa asirga olindi. Ammo hech birimiz jurnalistlarning ochlikdan o‘lganini eslay olmaymiz”, degan AFP vakillari.
Ushbu agentlikning fotograf xodimi ijtimoiy tarmoqlarda shunday xabar qoldirgan:
“Menda OAV uchun ishlashga ortiq kuch qolmadi. Juda ozib, holsiz bo‘lib qolganman. Ortiq ishlay olmayman”.
Izoh (0)