Serbiya Markaziy banki mamlakatga tegishli barcha oltin zaxiralarini o‘z hududiga qaytarishni rejalashtirmoqda. Bu qaror global inqirozlar fonida zaxiralarni xavfsiz saqlash maqsadida qabul qilindi. Bu haqda EuroAsia Daily xabar berdi.
Serbiya oltin zaxiralarini qaytarish ishlarini 2021-yilda, global beqarorlik kuchaygan paytda boshlagandi. Bu borada mamlakat Markaziy banki shunday izoh bergan:
“Oltinni mamlakatga qaytarish orqali biz uning inqiroz va noaniqlik davrida yanada xavfsiz bo‘lishini ta’minlamoqchimiz”.
Ushbu qaror natijasida Serbiya Sharqiy Yevropada o‘z oltin zaxiralarini Shveysariya, Buyuk Britaniya yoki AQSHda emas, balki to‘liq o‘z hududida saqlaydigan ilk davlatga aylanishi kutilmoqda.
Ma’lumotlarga ko‘ra, 2019-yildan 2023-yilgacha Serbiya xorijdan 17 tonna oltin sotib olgan. Shuningdek, Zijin Mining Group Co. kompaniyasidan 19 tonna oltin xarid qilgan. Hozirda mamlakatning umumiy oltin zaxirasi 50,5 tonnani tashkil etmoqda. Bu 6 milliard AQSH dollariga teng miqdordir. Ularning deyarli barchasi poytaxt Belgradda saqlanmoqda, faqatgina 2024-yilda xarid qilingan 5 tonna oltin hozircha Shveysariyada qolmoqda. Bu oltinlar ham tez orada mamlakatga olib kelinishi rejalashtiirlgan.
2022-yilda Rossiyaning valyuta zaxiralari muzlatib qo‘yilgach, ko‘plab markaziy banklar oltin to‘plashni ikki baravar tezlashtirib yuborgan. Bu esa dollar va yevroda saqlanayotgan aktivlarni xavf ostiga qo‘ygan. Oltinni o‘z hududida saqlash xorijiy aralashuvdan himoya qilishda muhim omil hisoblanadi.
Izoh (0)