Ukraina Qo‘shma Shtatlardan 322 million dollarlik qurol-yarog‘ sotib oladi. AQSH davlat departamenti tomonidan 23-iyul kuni tasdiqlangan paket havo hujumidan mudofaa va quruqlik texnikalarni o‘z ichiga oladi. Bu haqda AP News xabar berdi.
AQSH Kongressiga yuborilgan xabarnoma matniga ko‘ra, Qo‘shma Shtatlarda ishlab chiqarilgan zirhli texnikalarni sotib olish, texnik xizmat ko‘rsatish, ta’mirlash va modernizatsiya qilish uchun 150 million dollar, zenit-raketa tizimlari uchun esa 172 million dollar ajratilgan. Umumiy olganda, paketning qiymati 322 million dollarni tashkil etadi.
Oldinroq Pentagon rahbari Pit Xegset Ukrainaga qurol-yarog‘ yetkazib berishni to‘xtatishga ko‘rsatma bergandi. AQSH mudofaa vaziri buni mamlakat o‘z qurol-yarog‘ zaxiralarini baholashi lozimligi bilan izohlagan. Biroq masalaga Oq uy aralashgach, Qo‘shma Shtatlar Ukrainaga qurol-yarog‘ yetkazib berishni tikladi. Biroq endilikda ular uchun to‘lovni Yevropa o‘z zimmasiga oladi.
“Biz shunday qilishimizga to‘g‘ri keladi. Ular o‘zlarini himoya qila olishlari lozim. Ukraina hozir qaqshatqich zarbalar ostida. Biz yana birmuncha qurol-aslaha yuboramiz — birinchi navbatda mudofaa qurollarini”, degan edi Tramp.
Rossiya Ukrainaga keng ko‘lamli bosqin boshlagan 2022-yil fevralidan buyon Vashington tomonidan Kiyevga 67 milliard dollardan ortiq qurol-yarog‘ va harbiy texnikalar yetkazib berilgan.
Tramp hokimiyatga qaytgach Ukrainaga yordam borasida ma’lum muddat aniq pozitsiyasini bildirmadi. Ukraina esa, bu vaqt oralig‘ida AQSH ta’minlab kelgan qurol-yarog‘lar, ayniqsa havo hujumidan mudofaa raketalariga kuchli ehtiyoj sezdi. Yevropada ularning ba’zilari, masalan Patriotning o‘rnini bosa oladigan tizim hozircha yo‘q.
Izoh (0)