Rossiya va Ukraina o‘rtasida 23-iyul kuni asirlar almashinuvining to‘qqizinchi raundi bo‘lib o‘tdi. Unda har ikki tomonda 250 dan ortiq asirlar almashildi. Bu haqda Ukraina rahbari Vladimir Zelenskiy xabar berdi.
Bu tashabbusga 2-iyun kuni Istanbulda bo‘lib o‘tgan muzokaralarda kelishib olingandi. Asirlar almashinuvining yangi raundi haqida Zelenskiy Telegram’da ma’lum qilgan. Uning ta’kidlashicha, vataniga qaytganlarning aksar qismi 3 yildan ortiq vaqt davomida Rossiya asirligida bo‘lgan.
“Og‘ir kasal va jiddiy yaralangan askarlar uylariga qaytmoqda. Tafsilotlarga kelsak, Istanbuldagi so‘nggi kelishuvlarning barcha bosqichlarida biz 1000 dan ortiq harbiylarimizni qaytarishga muvaffaq bo‘ldik. Minglab oilalarga o‘z yaqinlarini yana bir bor quchoqlash quvonchini taqdim etdik. Bu harakatda qatnashgan barchaga rahmat”, degan Zelenskiy.
Istanbuldagi Rossiya muzokaralar guruhi rahbari Vladimir Medinskiy ham Ukraina—Belarus chegarasida bo‘lib o‘tgan asirlar almashinuvini tasdiqlagan. U Istanbuldagi o‘t ochishni to‘xtatish muzokaralarining uchinchi raundidan so‘ng shunday bayonot bergan:
“O‘tgan safar muhokama qilingan barcha kelishuvlar bajarilganini ma’lum qilamiz. Ayni paytda Ukraina—Belarus chegarasida har ikki tomondan taxminan 250 kishidan iborat harbiy asirlarning so‘nggi partiyalarini almashish yakunlanmoqda. Shunday qilib, taxminan 1 200 kishilik ikkinchi misli ko‘rilmagan katta almashinuv yakunlandi”.
Rossiya Mudofaa vazirligiga ko‘ra, vataniga qaytishini kutayotgan rossiyalik harbiy xizmatchilar hozirda Belarus respublikasi hududida bo‘lib, ularga zarur psixologik va tibbiy yordam ko‘rsatilmoqda.
Zelenskiy 23-iyul kuni Istanbulda Kiyev va Moskva o‘rtasida tinchlik muzokaralarining yangi raundi bo‘lib o‘tishini ma’lum qilgandi. Kecha boshlangan bu muzokaralarda Ukraina delegatsiyasi Rossiyaga avgust oyi oxirigacha ikki davlat prezidentlari o‘rtasida uchrashuv tashkil etishni taklif qilgan.
Bir soatdan kamroq davom etgan tinchlik muzokaralari yakunlari bo‘yicha o‘tkazilgan matbuot anjumanida Kiyev tomondan Rustem Umerov so‘zga chiqqan. U mamlakatlar o‘rtasida mahbuslar almashinuvi bo‘yicha “yanada ko‘proq choralar ko‘rilishi lozim”ligini ta’kidlagan.
Izoh (0)