Tayvanga yopirilgan “Danas” tayfuni ikki kishining hayotiga zomin bo‘ldi, jabrlanganlar soni esa 500 nafardan oshgan. Transport tizimi izdan chiqib, energetika infratuzilmasi jiddiy shikastlangan. Bu haqda Reuters agentligi xabar bermoqda.
Bo‘ron markazida shamol tezligi soatiga 220 kilometrga yetgan. Ayniqsa, janubi-g‘arbiy tuman katta zarar ko‘rgan. Tayfun yakshanba kuni kechqurun ilk bor shu yerda quruqlikka yetib keldi. Ta’kidlanishicha, bu g‘ayriodatiy holat, chunki tayfunlar odatda orolning sharqiy qirg‘oqlariga uriladi.
Bo‘ron tufayli g‘arbiy sohildagi maktablar va korxonalar yopilgan, 700 mingga yaqin xonadonda elektr ta’minoti uzilgan. Butun mamlakat bo‘ylab 700 dan ortiq daraxt ag‘darilgan, yo‘l infratuzilmasi shikastlangan, elektr uzatish liniyalarining beton ustunlari va qadimiy ibodatxonalardan birining darvozasi vayron bo‘lgan.
Bundan tashqari, tayfun 300 dan ortiq aviareysning bekor qilinishiga va tezyurar poyezdlar harakat jadvalining qisman buzilishiga sabab bo‘lgan.
Tayvan prezidenti Lay Szin-de fuqarolarni ehtiyot choralarini ko‘rishga chaqirdi.
Bundan avval “Erik” to‘foni Meksikaning Oaxaka shtatiga 4-toifali xavfli bo‘ron sifatida yopirilgandi. Hududda kuchli shamol va yomg‘irlarni qo‘zg‘atib, mamlakatda yilning eng kuchli bo‘roni deb topildi.
Iyun oyi o‘rtalarida Vyetnamning markaziy qismini qamrab olgan to‘fon shamollari va yomg‘irlar oqibatida 5 kishi halok bo‘lgan va yana 2 kishi bedarak yo‘qolgandi.
Izoh (0)