Eron prezidenti Ma’sud Pezeshkiyon mamlakat Isroil bilan urushga tayyorligini va yadro dasturi davom ettirilishini ma’lum qildi. Bu haqda Al Jazeera xabar berdi.
Prezident mamlakatlar o‘t ochishni to‘xtatish borasida optimistik munosabatda emasligini aytgan. Pezeshkiyon bu haqda 23-iyul kuni efirga uzatilgan Al Jazeera telekanaliga bergan eksklyuziv intervyusida ma’lum qilgan. Rahbarning ommaga intervyu berishi Isroil bilan 12 kunlik urush tugaganidan beri birinchisi bo‘ldi.
“Biz Isroilning har qanday yangi harbiy harakatiga to‘liq tayyormiz. Qurolli kuchlarimiz Isroilga zarba berishga shay. Eron 12 kunlik urushni yakunlagan o‘t ochishni to‘xtatish kelishuviga tayanmayapti. Biz bu borada unchalik optimist emasmiz”, dedi Pezeshkiyon Al Jazeera telekanaliga bergan intervyusida.
Eron rahbari mamlakat har qanday ehtimoliy ssenariy va javobga tayyorligini ma’lum qilgan. Shuningdek, Isroil 12 kunlik urush davomida davlatga yetgan zararni yashirayotgani bildirilgan. Prezidentning qo‘shimcha qilishicha, Isroilning zarbalari “Eron iyerarxiyasini yo‘q qilishga intilgan, lekin buni umuman uddalay olmagan”.
Ma’lumot uchun, iyun oyida bo‘lib o‘tgan Isroil—Eron o‘rtasidagi urushda Tehron tarafdan 900 dan ortiq odam halok bo‘lgan, ularning ko‘pchiligi tinch aholi. Isroilda esa 28 kishi qurbon bo‘lgani aytilgan. Tomonlar 24-iyun kuni AQSH vositachiligida o‘t ochishni to‘xtatishga kelishib olgandi.
Pezeshkiyon, shuningdek, Eron xalqaro qarshiliklarga qaramay, uranni boyitish dasturini davom ettirishini va yadroviy imkoniyatlarni rivojlantirish xalqaro qonunlar doirasida amalga oshirilishini aytgan.
“AQSH prezidenti Donald Tramp Eron yadro quroliga ega bo‘lishini xohlamaydi. Bu fikrga qo‘shilamiz, chunki biz yadro qurolidan voz kechdik. Bu bizning siyosiy, diniy, gumanitar va strategik pozitsiyamizdir. Eron diplomatiyaga ishonadi, shuning uchun kelajakdagi har qanday muzokaralar ikki tomonga ham foyda keltirishi kerak. Biz tahdid va buyruqlarni qabul qilmaymiz”, deya qo‘shimcha qilgan Eron rahbari.
Izoh (0)