BMTning yangi demografik hisobotiga ko‘ra, Hindiston aholisi 2025-yilda 1,46 milliardga yetgan. Bu haqda The Economic Times xabar berdi.
Bu dunyodagi eng yuqori ko‘rsatkichligi aytilgan. Shuningdek, mamlakatning umumiy tug‘ilish darajasi pasaygani ham qo‘shimcha qilingan. BMTning 2025-yilga mo‘ljallangan Jahon aholisi holati (SOWP) hisobotida millionlab odamlar farzandli bo‘lish maqsadi borasida qat’iy fikrga ega emasligi ta’kidlangan.
Hisobotda, shuningdek, aholi tarkibi, tug‘ilish va umr ko‘rish davomiyligidagi asosiy o‘zgarishlar ham ko‘rsatilgan bo‘lib, bu katta demografik o‘zgarishlardan darak bermoqda. Mamlakatda tug‘ilishning umumiy darajasi har bir ayolga 1,9 tagacha pasayib ketgan. Ya’ni o‘rtacha hind ayollari migratsiyasiz ravishda zarur bo‘lganidan kamroq farzand ko‘rmoqda.
Tug‘ilish darajasining pasayishiga qaramay, Hindistonda yoshlar soni sezilarli darajada: 0-14 yosh oralig‘ida 24 foiz, 10-19 yosh oralig‘ida 17 foiz va 10-24 yosh oralig‘ida 26 foizni tashkil etadi.
Mamlakat aholisining 68 foizi mehnatga layoqatli yoshda (15-64 yosh) bo‘lib, bu tegishli bandlik va siyosiy qo‘llab-quvvatlash bilan ta’minlansa, potensial demografik dividendni ta’minlaydi.
Keksa aholi (65 yosh va undan katta) hozirda 7 foizni tashkil etadi. Bu ko‘rsatkich keyingi o‘n yilliklarda umr ko‘rish davomiyligi yaxshilanishi bilan o‘sishi kutilmoqda. 2025-yil holatiga ko‘ra, umr ko‘rish davomiyligi erkaklar uchun 71 yoshni, ayollar uchun 74 yoshni tashkil etadi.
Mamlakat hozirda dunyodagi eng ko‘p aholiga ega davlat bo‘lib, bu ko‘rsatkich 1,5 milliardni tashkil etadi. Bu raqam taxminan 40 yildan keyin pasayishni boshlashdan oldin 1,7 milliardga o‘sishi kutilmoqda, deyilgan hisobotda.
1960-yilda Hindiston aholisi taxminan 436 million bo‘lgan. Har bir ayol o‘rtacha 6 nafarga yaqin farzand ko‘rgan. O‘sha paytlarda ayollarning o‘z tanasi va hayoti ustidan nazorati hozirgiga qaraganda kamroq edi. Hisobotda aytilishicha, har to‘rttadan bittasi kontrasepsiyaning biror-bir shaklidan foydalangan va har ikkitadan bittasi esa boshlang‘ich maktabda o‘qigan (Jahon banki ma’lumotlari, 2020-yil).
“Hindiston tug‘ilish darajasini pasaytirishda sezilarli yutuqlarga erishdi. 1970-yilda har bir ayolga besh nafarga yaqin bola to‘g‘ri kelgan bo‘lsa, bugungi kunda ta’lim va reproduktiv salomatlikni yaxshilash imkoniyati tufayli bu ikki nafarga yetdi. Bu onalar o‘limining sezilarli darajada kamayishiga olib kelgan, ya’ni bugungi kunda million ona tirik, bolalarni tarbiyalamoqda. Shunga qaramay, shtatlar, kastalar va daromad guruhlari o‘rtasida chuqur tengsizliklar saqlanib qolmoqda”, dedi Andrea M Vojnar, BMTning Hindistondagi vakili.
Izoh (0)