Shimoliy Irlandiyaning Ballimina shahrida o‘smir qizning zo‘rlanishi tufayli muhojirlarga qarshi yuz bergan tartibsizliklar natijasida 15 nafar politsiyachi yaralandi, bir necha uylar vayron qilindi. Bu haqda Daily Mail xabar bermoqda.
Ma’lum qilinishicha, dushanba kuni kechqurun 3 mingga yaqin odam Olster poytaxti Belfastdan taxminan 45 km uzoqlikda joylashgan shahar ko‘chalariga chiqqan. Zo‘rlash sodir bo‘lgan joy yaqinida o‘tkazilgan namoyish vaqt o‘tishi bilan politsiya bilan to‘qnashuvga aylanib ketgan. Namoyishchilar huquq-tartibot xodimlariga tosh va shisha idishlar ota boshlagan. Bundan tashqari, niqob taqqan shaxslar turar joy binolariga yonuvchi aralashma solingan shishalarni uloqtirgan.
“To‘rtta uy vayron qilindi, yana ikkita ko‘chmas mulk shikastlandi. Tartibsizliklar oqibatida 15 nafar politsiyachi kasalxonaga yotqizildi”, deb yozadi nashr.
Ma’lum bo‘lishicha, qizning zo‘rlanishi shanba kuni kechqurun Balliminada sodir bo‘lgan. Voqea izidan 14 yoshli ikki o‘smir qo‘lga olingan. Biroq ikkala hibsga olingan ham buni rad etgan. Ular sudyaning savollariga rumin tarjimoni yordamida javob berishgan.
Ta’kidlanishicha, namoyish dastlab bolalar va ularning daxlsizligini himoya qiluvchi plakatlar bilan tinch o‘tkazilgan. Ammo keyinchalik barrikadalar qurilishi bilan tartibsizliklarga aylanib ketgan.
“Balliminada sodir bo‘lgan tartibsizliklar katta tashvish uyg‘otmoqda. Bu hududdagi jinsiy zo‘ravonlik haqidagi xabarlar juda xavotirli, ammo mahalliy jamoalarni himoya qilishda davom etayotgan politsiya xodimlariga hujum qilishning hech qanday bahonasi yo‘q”, deydi Shimoliy Irlandiya Bosh vazirining rasmiy vakili.
Bundan avval Los-Anjelesda noqonuniy muhojirlarni aniqlash maqsadida o‘tkazilgan reyddan so‘ng tartibsizliklar boshlangani ma’lum bo‘lgandi. Namoyishchilar politsiya bilan to‘qnashuvlar va talonchiliklarga qo‘l urdi. Oq uy vakili sodir bo‘layotgan voqealarni isyon deb baholadi.
Izoh (0)