Tunis sudi sobiq prezident Monsef Marzukini davlat xavfsizligiga tahdid solishda ayblab, sirtdan 22 yillik qamoq jazosiga hukm qildi. Bu haqda Reuters agentligi ma’lum qildi.
“Men bu sudyalarga shunday deyman: sizlarning hukmlaringiz haqiqiy emas... Yaqin orada sizlarni ham sud qilishadi. Demokratiya qaytib keladi”, deb hukm haqida izoh berdi Parijda muhojirlikda yashayotgan 79 yoshli Marzuki.
Ushbu hukm Marzukiga nisbatan uchinchi hukm bo‘ldi. Bundan avval sobiq prezident hokimiyatga qarshi ayblovlar bilan bog‘liq ishlar bo‘yicha uzoq muddatli qamoq jazosiga hukm qilingan edi. U bu ayblovlarni soxta deb hisoblaydi.
Marzuki sud ta’qiblari uni qo‘rqitmasligini va Tunisga qattiq nazorat ostidagi boshqaruv emas, balki demokratiya zarurligini ta’kidlamoqda.
Marzuki 2011—2014-yillarda davlat rahbari lavozimini egallagan. U amaldagi prezident Qays Saidni parlamentni hokimiyatdan chetlatganidan so‘ng avtoritar tuzum o‘rnatganlikda ayblayapti. Said esa o‘z navbatida, uning harakatlari mamlakatdagi vaziyatni barqarorlashtirish uchun zarur bo‘lganini ta’kidlamoqda.
Said 2019-yilda davlat rahbari etib saylangan va 2024-yilda ikkinchi muddatga qayta saylangan.
Tunisdagi iqtisodiy inqiroz
Tunis bir necha yil mobaynida iqtisodiy inqirozni boshdan kechirdi, aholi oziq-ovqat mahsulotlari, ayniqsa qahva, sut va shakarni topishda qiyinchiliklarga duch keldi. 2021-yil yozida Said hukumatni iste’foga chiqardi va parlament faoliyatini to‘xtatib qo‘ydi. Bundan tashqari, u o‘z vakolatlarini kengaytirgan yangi konstitutsiya qabul qilinishiga erishdi.
Biroq Said o‘z hokimiyatini mustahkamlashiga qaramay, iqtisodiy vaziyatni yaxshilay olmagan.
2023-yilda mamlakatda prezident Qays Saidning iste’fosini talab qilib bir necha bor ommaviy norozilik namoyishlari o‘tkazildi.
Izoh (0)