Barselona markazi bo‘ylab 15-iyun kuni namoyishlar bo‘lib o‘tdi. Unda mahalliy aholi sayyohlarni shaharni tark etishga chaqirgan. Bu haqda BBC xabar berdi.
Namoyishchilar Barselona ko‘chalari bo‘ylab yurish qilar ekan, ularni suratga olayotgan sayyohlarga “Uyga qayting!” deya baqirgan. Ko‘cha qahvaxonalarida o‘tirgan sayyohlarga o‘yinchoq suv to‘pponchalari bilan suv sepilgan. Ularning ba’zilari kiyim-kechak do‘konlariga qamalib olgani aytilmoqda.
Turizm Ispaniya uchun juda muhim hisoblanib, Barselona tashrif buyuruvchilar tomonidan eng ko‘p tanlanadigan joydir. Ammo ularning miqdori shu qadar tez o‘smoqdaki, ko‘plab mahalliy aholi o‘z shaharlaridan siqib chiqarilayotganidan shikoyat qilmoqda.
“Biz bu shaharda yashay olmaymiz. BnB (uy-joy ijara xizmatlari), shuningdek, ob-havo sababli bu yerga kelib yashaydigan ekspatlar tufayli ijara haqi juda yuqori. Maqsadimiz turizmni to‘xtatish emas. Turizm foydali, ammo uni normal darajada ushlab turish kerak”, dedi mahalliy aholi vakillaridan biri.
Namoyishchilar Barselonaning eng diqqatga sazovor joylaridan biri, kataloniyalik me’mor Gaudi tomonidan loyihalashtirilgan Sagrada Familia baland cherkovi tomon yo‘l olgan. Bu hudud 2024-yili shaharga 15 milliondan ortiq mehmonni jalb qilgandi. Bu esa mahalliy aholi sonidan deyarli o‘n baravar ko‘p.
80 yoshli Pepi Viu yaqindagina qariyb o‘n yillik uyidan haydab yuborilgan. Unga ko‘ra, uy egasi nafaqaxo‘r to‘lashi mumkin bo‘lganidan ko‘proq ijara haqi olishni xohlagan. Pepi hozirda yotoqxonada bo‘lib, o‘ziga mosroq joy qidirmoqda. Ammo u oxirgi marta ijaraga uy olganidan beri narxlar deyarli 70 foizga oshib ketgan.
“Hech qanday qo‘llab-quvvatlovchi yo‘q. Hozir faqat turistik kvartiralar mavjud, lekin biz aholiga yashash uchun joy kerak!”, deb intervyu bergan qariya.
Namoyishlar bosimi ostida Barselona hukumati 2028-yildan boshlab sayyohlarga qisqa muddatli ijaraga berishni butunlay taqiqlash bo‘yicha radikal qadam tashlagan. Unga ko‘ra, 10 mingta uy egasi turistik uy-joy litsenziyasini yo‘qotadi.
Izoh (0)