Saudiya Arabistoni suveren jamg‘armasi bir nechta konsalting kompaniyalariga 1 trillion dollarlik futuristik The Line (Liniya) qurilishi loyihasini qayta tahlil qilishni topshirdi. Bu haqda Bloomberg xabar berdi.
Loyiha — 170 kilometr uzunlikdagi, 200 metr kenglikdagi va 500 metr balandlikdagi yotiq osmono‘par shahar qurilishini o‘z ichiga oladi. Fond loyihaning amalga oshirilishini tekshirish va zarurat tug‘ilsa, o‘zgartirishlar kiritishni so‘ragan. Bloomberg loyihani qayta ko‘rib chiqish sabablaridan quyidagilarni keltirgan:
- neft narxining kutilgan darajadan past bo‘lishi,
- xorijiy investitsiyalar oqimining sustligi,
- byudjet taqchilligi.
Hozirda Brent markali neft narxi bir barrel uchun 71 dollarga baholanmoqda, Saudiya byudjetining muvozanatli bo‘lishi uchun esa 96 dollar talab etiladi. Katta infratuzilma loyihalarini moliyalashtirish uchun bu summa hatto 113 dollarga yetishi lozim.
2024-yil aprel oyida Ar-Riyod The Line bo‘yicha rejalarni allaqachon qayta ko‘rib chiqqan edi. Dastlab 2030-yilgacha ushbu shaharda 1,5 million kishi yashashi rejalashtirilgan bo‘lsa, hozir bu raqam 300 ming kishigacha kamaytirilgan. Hozirda u yerda loyihada ishlayotgan ishchilardan tashqari hech kim yashamaydi. Qurilish 2021-yil oktyabr oyida boshlangan.
The Line — valiahd shahzoda Muhammad bin Salmon tashabbusi bo‘lgan Neom mega-loyihasining bir qismi. Ushbu loyiha doirasida Trojena tog‘-chang‘i kurorti va Sindalah dengiz kurorti kabi obyektlar ham qurilishi rejalashtirilgan.
Neom — Saudiya Arabistonining Vision 2030 strategik rejasining asosiy elementi bo‘lib, mamlakatni neftga qaram iqtisodiyotdan xalos etish va investorlar hamda sayyohlarni jalb qilishni maqsad qilgan.
Izoh (0)