AQSHning B-2 Spirit strategik stels-bombardimonchisi dushman yirik suv usti kemalarini yo‘q qilishga mo‘ljallangan qudratli Quicksink aviabombasini sinovdan o‘tkazdi Bu haqda AQSH harbiy-havo kuchlariga asoslanib Newsweek nashri ma’lum qildi.
“Biz harakatsiz yoki harakatlanayotgan kemalarga zarba berish qobiliyatimizni sezilarli darajada oshiradigan yangi Quicksink qurolini yaratdik”, dedi AQSH harbiy-havo kuchlari shtabi boshlig‘i general Devid Allvin.
AQSH harbiy-havo kuchlari tadqiqot laboratoriyasi press-relizida ta’kidlanishicha, Amerikaning ko‘rinmas bombardimonchisi yaqinda Tinch okeanida AQSHga qarshi turgan Xitoy harbiy-dengiz kuchlarining tez sur’atda kuchayishi sharoitida harbiy kemalarni cho‘ktirishga mo‘ljallangan “inqilobiy” qurolni sinovdan o‘tkazgan. Quicksink deb nomlanuvchi yangi qurol dengizdagi nishonlarni “tez va samarali” cho‘ktira oladi.
“Hozirda Xitoy harbiy-dengiz floti 370 ta kema va suvosti kemasidan iborat bo‘lib, AQSH harbiy-dengiz kuchlari tarkibidan son jihatidan ustunlik qilmoqda”, deya ta’kidlaydi nashr.
Quicksink bu — arzon, yuqori aniqlikdagi aviabombani yaratish dasturi bo‘lib, uning oshkor etilmagan xususiyatlari tufayli katta jangovar kemalarni yo‘q qilishi kafolatlangan.
AQSH Harbiy-havo kuchlari tadqiqot laboratoriyasi ma’lumotlariga ko‘ra, aviabomba sinovi aprel oyi oxirida Atlantika okeanidagi Florida yaqinida, shuningdek, o‘tgan yili Tinch okeanida o‘tkazilgan.
Izoh (0)