Rossiyada migrantlar uchun qo‘shimcha to‘lovlar joriy qilinishi mumkin. Bu haqda Rossiya davlat kengashi a’zosi Vyacheslav Volodin xabar berdi.
Uning ta’kidlashicha, tegishli qonun loyihasi kelgusi haftada imzolanadi.
“Rossiyaga vizasiz mamlakatlardan kelganlar oyiga o‘rtacha 8-10 ming rubl turadigan patent oladi. U uzog‘i bilan bir yil amal qiladi. So‘ngra patent olish jarayonini qaytadan o‘tkazish kerak bo‘ladi. Viza talab qiladigan mamlakatlardan kelgan muhojirlar esa ishlash uchun ruxsatnoma rasmiylashtirishiga to‘g‘ri keladi. Ushbu haftada migrantlar uchun qo‘shimcha davlat bojlari joriy etadigan qonun loyihalarini ko‘rib chiqishni boshlaymiz”, degan Volodin.
Volodin taqdim etgan yangi qonun loyihasiga ko‘ra, migrantlar quyidagi to‘lovlarni qoplashi kerak bo‘ladi:
- chet el fuqarosiga yoki fuqaroligi bo‘lmagan shaxsga patent berganlik yoki qayta rasmiylashtirganlik uchun — 4 200 rubl;
- ishlash ruxsatnomaning amal qilish muddatini uzaytirish uchun — 4 200 rubl;
- patent yoki ishlash uchun ruxsatnoma dublikatini berganlik, ularga o‘zgartirishlar kiritganlik uchun — 2 100 rubl.
Bundan tashqari, migrantlar uchun bir qator boshqa bojlarini belgilash yoki oshirish taklif qilinmoqda. Jumladan:
- chet el fuqarosi yoki fuqaroligi bo‘lmagan shaxsni turgan joyi bo‘yicha hisobga qo‘yish uchun;
- chet el fuqarosi yoki fuqaroligi bo‘lmagan shaxsni mamlakatda yashash joyi bo‘yicha ro‘yxatdan o‘tkazganlik uchun;
- Rossiyada vaqtincha bo‘lish muddatini uzaytirish uchun;
- avtomobillar va boshqa transport vositalari bilan bog‘liq ro‘yxatdan o‘tkazish harakatlarini amalga oshirganlik uchun to‘lovlar joriy etiladi.
Bularning barchasi nafaqat byudjetga mablag‘ tushumini oshirish, balki migrantlar ustidan nazoratni kuchaytirish, ularning haqiqiy yashash joylarini aniqlash imkonini beradi. Rasmiylarga ko‘ra, bu noqonuniy migratsiya darajasini pasaytirishga ham xizmat qiladi.
Izoh (0)