AQSH prezidenti Donald Tramp Los Anjelesda bo‘layotgan norozilik namoyishlari fonida Kaliforniya gubernatori Gevin Nyusomni vaziyatni boshqara olmayotganlikda aybladi. Bu haqda u o‘zining Truth Social ijtimoiy tarmoqdagi sahifasida yozdi.
“Los Anjelesda so‘nggi ikki kecha tinch o‘tdi. Buyuk Milliy gvardiyamiz dengiz piyodalari yordamida Los Anjeles politsiyasiga o‘z vazifasini samarali bajarish imkonini yaratdi. Ular birgalikda yaxshi ishladilar, biroq harbiylarsiz Los Anjeles biz uzoq yillardan beri ko‘rmagan jinoyat o‘chog‘iga aylanardi. Gubernator Geyven Nyuskam vaziyatni butunlay nazorat qila olmay qoldi. Uni qutqarganingiz uchun RAHMAT aytishi kerak”, deya yozdi Tramp.
Shu bilan birga, prezident Nyusomning familiyasini haqoratli tarzda buzib ko‘rsatdi va uni huquq-tartibot idoralariga minnatdorlik bildirish o‘rniga o‘z layoqatsizligini oqlashga urinayotgani uchun qattiq tanqid qildi.
6-iyun kuni Los Anjelesda noqonuniy muhojirlarni ommaviy hibsga olish boshlandi, 7-iyun kuni kechqurunga kelib migratsiya qonunchiligini buzganlikda ayblanib, kamida 44 kishi qamoqqa olindi. Huquqni muhofaza qilish organlarining bu harakatlariga javoban shaharda tartibsizliklarga aylanib ketgan namoyishlar boshlandi. AQSH prezidenti Donald Tramp Kaliforniya gubernatori Gevin Nyusomni chetlab o‘tib, tartibsizliklarni bostirish uchun Los Anjelesga Milliy gvardiya askarlarini yuborishni buyurdi. Shundan so‘ng, Nyusom Tramp va Pentagon rahbari Pit Xegsetga qarshi sudga murojaat qildi. Gubernator Milliy gvardiya askarlarini Los Anjelesga yuborish to‘g‘risidagi qarorni g‘ayriqonuniy deb topishni so‘ramoqda.
Izoh (0)