Kamboja bosh vaziri Xun Manet 14-iyul kuni mamlakatda 2026-yildan harbiy xizmatga chaqiruv boshlanishini ma’lum qildi. Bu haqda Euronews xabar berdi.
Qaror Tailand bilan chegarada davom etayotgan keskinlik sabab qabul qilingani ta’kidlangan. Xun Manet 2026-yildan boshlab yetishmovchiliklarni to‘ldirish va armiyaning imkoniyatlarini oshirish uchun armiyaga chaqiruv boshlanishini bildirgan. Uning aytishicha, chaqiruv orqali armiyaga oldin qo‘shilgan askarlar ko‘ngilli kuchlarga qaraganda professional va samaraliroq natija ko‘rsatgan.
Armiyaga chaqiruv to‘g‘risidagi qonun 2006-yilda qabul qilinib, shu kungacha hech qachon amalga oshirilmagan edi. Kamboja armiyasida 18 yoshdan 30 yoshgacha bo‘lgan erkak va ayollar xizmat qilishi lozim. Lekin harbiy xizmat ayollar uchun majburiy emas.
Taxminlarga ko‘ra, Kamboja qurolli kuchlarining umumiy soni 200 ming kishini tashkil etadi. Tailandda esa 350 ming faol askarlar mavjud. Ikki mamlakat o‘rtasidagi munosabatlar 28-may kuni bo‘lib o‘tgan qurolli qarama-qarshilikdan so‘ng keskin yomonlashgandi. Hodisada bir nafar kambojalik askar halok bo‘lgan.
Tomonlar keyingi to‘qnashuvlarga yo‘l qo‘ymaslik uchun ziddiyatni yumshatishga kelishib olgan. Ammo ikkala davlat ham bir-biriga qarshi choralar ko‘rish va tahdid qilishda davom etmoqda. Ushbu mojarolar Tailandning ichki siyosatiga ham ta’sir ko‘rsatgan.
Tailand bosh vaziri Paetongtarn Shinavatra iyul oyi boshida Kambojaning sobiq bosh vaziri Xun Sen bilan telefon orqali suhbat qilgan. Bu so‘zlashuv internetda tarqalib ketib, Shinavatraning lavozimdan ketishiga sabab bo‘lgandi.
Izoh (0)