Kanada hukumati boshpana so‘rovlarini cheklash va hukumatga immigratsiya arizalarini ko‘rib chiqishni to‘xtatish uchun ko‘proq vakolat berish to‘g‘risidagi qonun loyihasini taklif qildi. Bu haqda BBC xabar berdi.
Kanada immigratsiya vaziri Lena Diabning aytishicha, “Kuchli chegaralar to‘g‘risida”gi qonun uyushgan jinoyatchilik, noqonuniy giyohvand moddalar va qurollar oqimini cheklash, immigratsiya tizimini kuchaytirishga qaratilgan.
Taklif politsiyaga mamlakatning AQSH bilan chegarasini kuzatish uchun ko‘proq vakolat beradi. Shuningdek, Kanadada bir yildan ortiq bo‘lganlarga boshpana so‘rash taqiqlanishi mumkin. Qonun loyihasida hukumat pochtani ochish va tekshirish imkoniyatini kengaytirish bandi ham bor. Bunga tanqidchilar salbiy fikr bildirib, bu fuqarolik erkinliklariga putur yetkazishi haqida ogohlantirgan.
Sobiq bosh vazir Jastin Tryudoning hukumati iqtisodiy o‘sishni rag‘batlantirish uchun immigratsiyaga tayangan. Shunga asosan, Kanadaga vaqtinchalik ishchilar va talabalar kirishi rag‘batlantirilgan.
So‘nggi vaqtlarda Kanadada boshpana so‘rovlari soni keskin oshib, arizachilar ikki yilgacha kutishga majbur bo‘lmoqda. Aprel oyida bo‘lib o‘tgan federal saylovlarda g‘alaba qozongan bosh vazir Mark Karni Kanadadagi barqaror bo‘lmagan immigratsiya darajasini bartaraf etishga va’da bergan.
Yangi qonun hukumatga jamoat salomatligi yoki milliy xavfsizlik xavfi tug‘ilganda arizalarni ko‘rib chiqishni to‘xtatish vakolatini beradi. 127 sahifalik hujjatda tergov maqsadida pochtalarni tekshirish huquqi kengaytiriladi. Shuningdek, 7300 dollardan ortiq naqd pul operatsiyalari va boshqalarning hisobiga pul o‘tkazmalari cheklanadi.
Izoh (0)