Xitoy Qurolli kuchlariga tegishli jami 31 ta harbiy samolyot va 10 ta kema 28-may kuni Tayvan hududi yaqinida aniqlangan. Bu haqda Anadolu xabar berdi.
Vazirlikka ko‘ra, kunning birinchi yarmida orol atrofidagi havo hududida Xitoy aviatsiya faolligi kuzatilgan. 31 ta samolyotdan 22 tasi Tayvan bo‘g‘ozining o‘rta chizig‘ini bosib o‘tgan.
Parvozlar Tayvan havo mudofaasi identifikatsiya zonasining shimoliy, markaziy, janubi-g‘arbiy va sharqiy hududlarida amalga oshirilgan. Shuningdek, orol yaqinida 9 ta harbiy kema va “rasmiy” deb belgilangan 1 ta kema aniqlangan.
Tayvan harbiylari vaziyatni diqqat bilan kuzatayotganini va tegishli choralarni ko‘rayotganini ma’lum qilgan.
Ma’lumot uchun, Xitoy Tayvanni o‘z hududining ajralmas qismi deb hisoblaydi. Orol 1949-yildan beri amalda mustaqil boshqaruv ostida bo‘lsa-da, Pekin uni materik bilan “qayta birlashtirish” uchun kuch ishlatish ehtimolini istisno qilmayapti.
Izoh (0)