Garvard universitetining 12 mingdan ortiq bitiruvchisi Tramp ma’muriyatining 2,2 milliard dollardan ortiq federal mablag‘ ajratishni cheklash qaroriga qarshi chiqib qonuniy xabarga imzo chekdi. Bu haqda CNN xabar berdi.
Garvardning 1950—2025-yillar davomidagi bitiruvchilari amicus briefʼga imzo chekdi. Bu uchinchi tomondan sudga ish bo‘yicha qo‘shimcha ma’lumot beruvchi da’vo arizasiga yuborilgan huquqiy hujjat hisoblanadi. Brif 9-iyun kuni sudga taqdim etilgan.
Bitiruvchilarning fikricha, bunday hodisa Garvard tarixida hali kuzatilmagan. Garvard o‘zini himoya qilmoqda va o‘z navbatida akademik erkinlik, federal moliyalashtirish va kampus nazorati bo‘yicha boshqa kollejlar va universitetlar uchun namuna yaratayotgani aytildi.
Garvard aprel oyida Tramp ma’muriyatini federal moliyalashtirishni muzlatish qarori yuzasidan sudga berib, ish bo‘yicha yakuniy qarorni tezroq qabul qilishni so‘ragan. 21-iyulda dastlabki eshituv bo‘lishi kutilmoqda.
“Biz bitiruvchilar sifatida hukumatning Garvard va boshqa oliy ta’lim muassasalarining asosiy funksiyalari ustidan nazoratni o‘rnatishidan chuqur xavotirdamiz. Tegishli jarayonlarsiz yoki qonunda tan olinadigan asoslarsiz — va Konstitutsiya tomonidan ta’minlangan erkinliklar va u o‘rnatgan cheklovlarni butunlay e’tiborsiz qoldirib — hukumat Garvardga zarar yetkazish uchun o‘z ixtiyoridagi barcha kuchlarni ishga solish harakatini boshladi. Hukumatning pirovard maqsadi bizning ta’lim olish, o‘qitish, fikrlash va harakat qilish erkinliklarimizni cheklash va bu erkinliklardan kim foydalanishi mumkinligini belgilash huquqiga da’vo qilishdir”, deyilgan brifda.
Izoh (0)