Turkiyaning shimoli-g‘arbiy qismida joylashgan to‘rtinchi yirik shahri — Bursa o‘rmon yong‘inlari qurshovida qoldi. Hududda yuz bergan yong‘inlar oqibatida kamida 1 700 dan ortiq aholi xavfsiz joyga evakuatsiya qilindi, bir nafar o‘t o‘chirish xodimi halok bo‘ldi. Bu haqda Anadolu xabar berdi.
Bursa hokimligiga ko‘ra, 28-iyul kuni 1 765 nafar odam xavfsiz joyga evakuatsiya qilingan. Yong‘inlarga qarshi kurashda 1 900 dan ortiq o‘t o‘chiruvchi va 500 nafar qutqaruvchi jalb etilgan.
27-iyulga o‘tar kechasi tog‘larda boshlangan yong‘in tezlik bilan tarqalib, Bursa osmoni qizg‘ish tusga kirgan. Oqibatda shaharni poytaxt Anqara bilan bog‘lovchi asosiy avtomobil yo‘li yopilgan. Shahar meri Mustafa Bozbey yong‘inlar 3 ming gektardan ortiq maydonni qamrab olganini va bir nafar o‘t o‘chiruvchi yurak xurujidan vafot etganini ma’lum qilgan.
Turkiya o‘rmon xo‘jaligi vaziri Ibrohim Yumakli bergan ma’lumotga ko‘ra, mamlakat bo‘ylab jami 84 ta yirik yong‘inga qarshi kurash olib borilmoqda. Ayniqsa, Karabuk viloyatida vaziyat og‘ir bo‘lib, u yerda yong‘inlar 22-iyuldan beri davom etmoqda.
Yong‘inlarning avj olishiga misli ko‘rilmagan issiq havo, qurg‘oqchilik va kuchli shamollar sabab bo‘lmoqda. Yumaklining so‘zlariga ko‘ra, hozirda 6 ta samolyot va 4 ta vertolyot hodisani bartaraf etishga safarbar qilingan.
“Og‘ir kunlardan o‘tyapmiz. Bu holat ikki-uch kunda tugaydiganga o‘xshamayapti”, dedi u.
Adliya vaziri Yilmaz Tunch ma’lum qilishicha, 26-iyundan buyon 33 viloyatda sodir bo‘lgan yong‘inlar yuzasidan surishtiruv ishlari olib borilmoqda. 97 kishi ustidan huquqiy choralar ko‘rilgan.
Turkiya Meteorologiya bosh boshqarmasiga ko‘ra, 26-iyul, juma kuni janubi-sharqdagi Shirnak viloyatida harorat 50,5 darajaga yetib, mamlakat tarixidagi eng yuqori ko‘rsatkich qayd etilgan. Iyul oyida umumiy 132 ta hududda rekord darajadagi harorat kuzatilgan. Avvalgi rekord esa 2023-yil 15-avgust kuni o‘rnatilgandi. O‘shanda Sarichakaya hududida 49,5 daraja issiq qayd etilgan.
Izoh (0)