Jazoir prezidenti Abdulmajid Tabbun mamlakat mahsulotlariga qo‘llangan 30 foizlik AQSH savdo bojlarini qo‘llab-quvvatladi. Bu haqda TRT Global xabar berdi.
Tabbun savdo bojlarini mamlakat iqtisodiyotiga minimal ta’sir ko‘rsatadigan “suveren akt” deb atadi. Uning ta’kidlashicha, AQSH bilan savdo Jazoir umumiy tashqi savdosining 0,5 foizidan kamrog‘ini tashkil qiladi.
“Biz AQSHga asosan neft xomashyosi va armatura eksport qilamiz. Bu tariflar iqtisodiyotimizning o‘zagiga ta’sir ko‘rsatmaydi”, dedi Shimoliy Afrika davlati prezidenti.
Ekspertlarning ta’kidlashicha, Jazoirning AQSHga qiladigan eksportining aksariyati bojlardan ozod qilingan, shu sabab ushbu tariflarning ta’siri sezilarsiz bo‘ladi.
Jazoir va Qo‘shma Shtatlar murakkab, ammo umuman olganda ijobiy munosabatlarga ega bo‘lib, xavfsizlik va terrorizmga qarshi kurash sohalarida hamkorlik qiladi. 1967-yilgi arab-isroil urushidan keyin ikki davlat o‘rtasida bir muddat keskin munosabatlar davri hukm surgan. Shunday bo‘lsa-da, vaqt o‘tishi bilan ular sheriklikni qayta tiklashga muvaffaq bo‘lgan. Hamkorlar o‘rtasidagi diplomatik munosabatlar dastlab 1962-yilda Jazoir mustaqillikka erishgandan so‘ng o‘rnatilgandi.
Ma’lumot uchun, Jazoir iqtisodiyoti Afrikadagi eng yiriklaridan biri bo‘lib, asosan tabiiy resurslarga, xususan neft va gazga tayangan. Neft va gaz eksporti tashqi savdoning 90 foizidan ortig‘ini tashkil etadi. Energiya sektori mamlakat yalpi ichki mahsulotining taxminan 20–25 foiziga to‘g‘ri keladi.
Izoh (0)