AQSH prezidenti Donald Tramp Isroil tomonidan blokada qilingan G‘azo sektorida haqiqiy ocharchilik yuz berayotganini aytdi. Bu bayonot Isroil bosh vaziri Binyamin Netanyaxuning anklavda “ocharchilik mavjud emas” degan fikriga zid kelmoqda. Bu haqda BBC xabar berdi.
Tramp Shotlandiyada Buyuk Britaniya bosh vaziri Kir Starmer bilan uchrashuv chog‘ida jurnalistlarga bergan intervyusida shunday degan:
“Bilmadim… lekin bolalar juda ochga o‘xshaydi. Bu haqiqiy ocharchilikdan boshqa narsa emas”.
Trampning bu fikrlari BMTning gumanitar masalalar bo‘yicha rahbari Tom Fletcher izohlaridan keyin yangradi. U BBC’ga bergan intervyusida G‘azoda ocharchilikning oldini olish uchun katta miqdorda oziq-ovqat kerakligini aytgandi. Fletcher Isroilning sektorga gumanitar yordamni kiritish va harbiy harakatlarni vaqtincha to‘xtatish qarorlarini olqishlagan. Ammo bu yordam “dengizga tomgan tomchi” ekani ta’kidlangan.
“Bu boshlanishi, ammo oldimizdagi bir necha kun hal qiluvchi bo‘ladi. Juda katta miqdorda va tezda yordam zarur”, dedi Fletcher.
Isroil armiyasi 27-iyul kuni harbiy harakatlarda “taktik tanaffus” e’lon qilib, 120 ta yuk mashinasining G‘azoga kiritilganini bildirgan. Shundan keyin Iordaniya va BAA 28 ta oziq-ovqat paketini havo orqali tashlagan.
Shu bilan birga, G‘azo Sog‘liqni saqlash vazirligi o‘tgan 24 soat ichida ocharchilik oqibatida yana 14 kishi halok bo‘lganini ma’lum qilgan. Urush boshlangan 2023-yil oktyabrdan beri ocharchilik sababli vafot etganlar soni 147 kishiga yetdi, ularning 88 nafari bolalardir.
Isroil tomoni G‘azoda ocharchilik borligini inkor etmoqda va bunda ayblanuvchi emasligini ta’kidlamoqda. Netanyaxu bu boradagi ayblovlarni “ochiqchasiga yolg‘on” deb atagan.
“Biz urush davomida ham gumanitar yordam kirishini ta’minlab keldik. Aks holda, G‘azoda birorta odam tirik qolmagan bo‘lardi. Yordamga to‘sqinlik qilayotgan yagona kuch — bu HAMAS”, degan Isroil bosh vaziri.
BMT vakili Fletcherning aytishicha, 27-iyul kuni yordam olib kirilgan yuk mashinalarining ko‘pchiligi G‘azoda ochlarchilikdan aziyat chekayotgan aholi tomonidan talon-toroj qilingan.
“Un ortilgan yuk mashinalariga och qolgan odamlar tashlandi. Bu haydovchilarimiz uchun juda xavfli”, dedi u.
Fletcher, shuningdek, Isroil armiyasi e’lon qilgan “pauzalar” uzoqqa cho‘zilmasligi mumkinligini aytib, bu yetarli emasligini bildirgan.
“Oziq-ovqat va yordam yig‘ilishi uchun bizga haftalar, oylar kerak. Eng muhim narsa — bu o‘t ochishni to‘xtatishdir”, deya qo‘shimcha qilgan u.
Izoh (0)