AQSH sobiq prezidenti Bill Klinton Isroil bosh vaziri Binyamin Netanyaxu Eronga qarshi urush olib borish orqali hokimiyatda uzoq qolishga intilayotganini aytdi. U amaldagi prezident Donald Trampni Yaqin Sharqdagi vaziyatni yumshatishga chaqirdi. Bu haqda New York Post xabar berdi.
Hozirgacha AQSH urushga bevosita aralashmagan, biroq Tehrondan uchirilgan raketalarni urib tushirishda Isroilga yordam ko‘rsatgan. Tramp ma’muriyati mojaroga yanada faol aralashish ehtimolini ko‘rib chiqmoqda.
Janob Netanyaxu uzoq vaqtdan beri Eronga qarshi urush ochishni xohlaydi, chunki bu orqali u hokimiyatda abadiy qolishi mumkin. Aytish mumkinki, u so‘nggi 20 yilning aksariyatida bosh vazir bo‘lib ishlagan. Ammo biz bu vaziyatni yumshatishga harakat qilishimiz kerak, prezident Tramp shunday qiladi deb umid qilaman, dedi demokratlar partiyasidan chiqqan sobiq prezident Klinton.
Uning ta’kidlashicha, Tramp ham Netanyaxu kabi falastinliklar alohida davlatga ega bo‘lmasligi kerak, degan fikrga qo‘shiladi.
Avvalo, ular Yaqin Sharqda tinchlik muzokaralarini olib borish haqida gapirmayapti, chunki bosh vazir Netanyaxu rahbarligidagi Isroil falastinliklarga davlat berish niyatida emas. Endi esa falastinliklar shu qadar bo‘lingan va ezilganki, o‘zlari ham birlashib, bunga erisha olmayapti, dedi Klinton.
U AQSHning Yaqin Sharqdagi ittifoqchilarini himoya qilish zarurligini aytib, ehtiyotkorlikka ham chaqirdi.
Biz mintaqadagi do‘stlarimizni ularning yonida ekanimizga va ularni himoya qilishga tayyorligimizga ishontirishimiz kerak. Biroq siyosiy jihatdan betaraf bo‘lgan va shunchaki hayot kechirishni istagan tinch aholiga qarshi olib borilayotgan e’lon qilinmagan urushlar — yaxshi yechim emas, ta’kidladi u.
Klinton AQSH Eronning yadro quroliga ega bo‘lishiga yo‘l qo‘ymasligi kerakligini tan oldi. Biroq begunoh insonlar hayotini asrash birinchi o‘rinda turishi kerakligini qayd etdi.
Eronni yadro quroliga ega bo‘lishdan to‘xtatishga urinishimiz kerakmi? Menimcha, ha. Lekin o‘zini himoya qila olmaydigan va shunchaki yashash imkoniyatini xohlayotgan tinch aholini doimiy ravishda o‘ldirishga hojat yo‘q, deya xulosa qildi Klinton.
Izoh (0)