AQSHning Minnesota shtati senatori Omar Fotih o‘z nomzodini Minneapolis meri lavozimiga qo‘ygandan so‘ng, internetda o‘zining ba’zi siyosiy qarashlari sabab irqchilik hujumlariga duch kelmoqda. Bu haqda The Times of India xabar berdi.
34 yoshli Omar Fotih saylov kampaniyasiga kirishgan. Uning saylovoldi dasturiga ko‘ra, 2028-yilga kelib Minneapolis shahrida eng kam soatbay ish haqi 20 dollarga yetkaziladi. Nomzod, bundan tashqari, ijara haqini muzlatish va politsiyaning federal immigratsiya organlari bilan hamkorligini bloklash kabi takliflarni ham ilgari surgan.
Fotihning siyosiy fikrlari va irqiy kelib chiqishi internetda unga nisbatan norozilik kayfiyatini yuzaga keltirgan. Konservativ qatlam uni “terrorchi” deb atamoqda. Shuningdek, uni mashhur nyu yorklik siyosatchi Zohran Mamdaniga o‘xshatganlar ham bor. Ba’zilar uni “Mamdanining kichikroq versiyasi” deya ta’kidlamoqda.
Tanqidchilar undan Somaliga qaytib ketishini talab qilgan. Ba’zilar uning tashqi ko‘rinishi ustidan ham kulmoqda.
“Boshining shaklidan uning somalilik ekani bilinib turibdi. U Mogadisho (Somali poytaxti) meri lavozimiga nomzodini qo‘yishi kerak”, deb yozgan konservativ siyosiy strateg Joey Mannarino.
Boshqalar Fotih Vashingtonda tug‘ilgani va 2021-yildan beri Minnesota qonun chiqaruvchi organida ishlab kelayotganiga qaramay, uning fuqaroligi soxtaligini da’vo qilgan. Hattoki, internetda Somali haqida kamsituvchi gaplar ham tarqalgan. Fotih bu diskriminatsiyalarga e’tibor bermay, bo‘lajak saylovlarga o‘z e’tiborini qaratgan.
Nyu York merligiga saylov
Omar Fotih ko‘p jihatdan Zohran Mamdani fenomenini eslatib yuboradi. U muhojir oilasida tug‘ilgan bo‘lib, islom diniga e’tiqod qiladi. Nyu York merligi uchun Demokratik partiya praymerizida g‘olib chiqqan nomzod o‘zining sotsialistik qarashlarini yashirib o‘tirmaydi. Shu bois AQSH prezidenti Donald Tramp Mamdanini bir necha bor kommunist deb atagan.
Byudjeti 115 milliard dollarni tashkil qiladigan, aholisi salkam 10 millionga yetadigan shaharni kim boshqarishi shu yil kuzida ma’lum bo‘ladi. Biroq nyu yorkliklarning aksariyati demokrat nomzodlarni qo‘llab kelgani bois, sharhlovchilar Mamdanining g‘alabasiga shubha qilmaydi.
Izoh (0)