Janubiy Koreyada to‘rt kun davomida yog‘gan jala keng ko‘lamli ofatlarga sabab bo‘ldi. So‘nggi rasmiy ma’lumotlarga ko‘ra, kamida 5 kishi halok bo‘lgan, 4 kishi bedarak yo‘qolgan, deya xabar bermoqda Yonhap.
Besh mingdan ortiq xonadondan yetti mingdan ziyod odam evakuatsiya qilindi, 2800 dan ortiq kishi esa suv bosgan yo‘llar va vayron bo‘lgan xonadonlar tufayli hozircha uylariga qayta olmayapti.
Ta’kidlanishicha, mamlakatning turli hududlarida kuchli yomg‘ir yog‘ishi davom etmoqda, bu yo‘llarni yuvib, ko‘chkilarga sabab bo‘lmoqda. So‘nggi to‘rt kundagi yog‘ingarchilik miqdori yillik me’yordan o‘rtacha 40 foizga ortgan. Jamoat infratuzilmasiga zarar yetkazish bilan bog‘liq 729 ta holat va mingdan ortiq xususiy mulkka zarar yetkazish holatlari qayd etilgan.
Eng ko‘p Chxunchxon va Kengido viloyatlari zarar ko‘rgan. Bir qator hududlarda bir sutka ichida rekord darajada yomg‘ir yog‘gan. Sosan shahrida 340 mm dan ortiq yomg‘ir qayd etilgan bo‘lib, bu so‘nggi 50 yildagi eng yuqori ko‘rsatkich hisoblanadi.
Suv toshqinlari yana o‘nlab shaharlarga, jumladan, janubiy Cholla-Namdo viloyatiga ham ta’sir ko‘rsatgan. Seuldan 50 km janubda joylashgan Osan shahrida tirgak devor o‘tib ketayotgan avtomobil ustiga qulab tushgan. Oqibat haydovchi halok bo‘lgan. Sosanda suv bosgan mashinada halok bo‘lgan erkak topilgan, shuningdek, tan jarohati olganlar va sovuq qotganlar borligi xabar qilingan.
Ma’lum qilinishicha, jala yomg‘irlar oqibatida ko‘chkilar va suv toshqinlari yuz bergan, avtomobil yo‘llarining ayrim qismlari vaqtincha yopilgan, jamoat transportida uzilishlar qayd etilgan. Jumladan, poyezdlar harakati qisman to‘xtatilib, avtobus qatnovlari bekor qilingan. Mahalliy hokimiyat organlari tog‘ yonbag‘irlarining qulash xavfi yuqori bo‘lgan hududlar aholisini xavfsiz joylarga ko‘chirgan.
Prognozlarga ko‘ra, xavfli ob-havo sharoiti kamida hafta oxirigacha saqlanib qoladi. Hokimiyat organlari fuqarolarni ehtiyot choralarini ko‘rishga hamda ob-havo va evakuatsiya haqidagi rasmiy ma’lumotlarni kuzatib borishga chaqirishni davom ettirmoqda.
Bundan avval Pokistonning Panjob provinsiyasida 16-iyul kuni shiddatli musson yomg‘irlari boshlangani, tabiiy ofat sabab so‘nggi 24 soat ichida 63 kishi halok bo‘lib, 290 kishi jarohatlangani xabar qilingandi.
Nepalda so‘nggi bir oy ichida musson yomg‘irlari bilan bog‘liq hodisalarda 30 dan ortiq odam hayotdan ko‘z yumdi, 150 kishi jarohatlangani ma’lum qilingandi.
AQSHning Texas shtatida 4-iyul kuni boshlangan suv toshqinlari oqibatida halok bo‘lganlarning soni 100 nafardan oshgani xabar qilingandi.
Izoh (0)