AQSH prezidenti Donald Trampning Ukraina bo‘yicha maxsus vakili Keyt Kellog 14-iyul kuni rasmiy tashrif bilan Kiyevga keldi. Bu haqda Deutsche Welle xabar berdi.
Ukraina prezidenti devoni rahbari Andrey Yermak AQSH vakilining tashrifiga munosabat bildirib, muhokamalar markazidan mudofaa, xavfsizlikni mustahkamlash, qurol-yarog‘, sanksiyalar va boshqa muhim mavzular o‘rin olishini ta’kidladi.
“Mudofaa, xavfsizlikni mustahkamlash, qurol-yarog‘, sanksiyalar, xalqni himoya qilish, Ukraina va AQSH o‘rtasidagi hamkorlikni mustahkamlash... Muhokama qilinadigan masalalar ko‘p. Russiya o‘t ochishni to‘xtatmoqchi emas. Biz AQSH prezidenti Donald Trampning ‘kuch orqali tinchlik’ prinsipini qo‘llab-quvvatlaymiz”.
Kellog Ukraina poytaxtida qancha bo‘lishi noma’lum. Avvalroq u Kiyevga bir haftalik tashrif rejalashtirganini aytgan edi.
Maxsus vakil bu haqda ilk bor Ukrainani tiklash bo‘yicha Rimda bo‘lib o‘tgan konferensiyada ma’lum qilgan, keyinroq Ukraina tashqi ishlar vazirligi ham kutilayotgan tashrif haqidagi xabarlarni tasdiqlagan edi. Kellogning tashrifi Donald Tramp rossiyalik hamkasbidan “hafsalasi pir bo‘lganini” aytgan voqealar fonida yuz bermoqda. Shu bois maxsus vakildan jiddiy bayonotlar kutilyapti.
Izoh (0)