Isroil hukumati 20-iyul kuni G‘azo sektori markazidagi falastinliklarni evakuatsiya qilish to‘g‘risida buyruq chiqardi. Bu haqda Arab News xabar berdi.
Yahudiy davlati bu qarorni hududda HAMAS jangarilariga qarshi tez orada boshlanadigan harakatlar bilan izohlagan. Ta’kidlanishicha, markazdagi falastinliklar va Deyr-el-Bala hududida yashayotgan aholi zudlik bilan evakuatsiya qilinishi lozim.
Aholiga “xavfsizlik uchun” O‘rta yer dengizi sohilidagi Al-Mavosiy hududi tomon janubga ko‘chish buyurilgan. Ikki milliondan ortiq G‘azo aholisining aksariyati urush boshlanganidan beri bir necha marta ko‘chishga majbur bo‘lgan. BMTning ta’kidlashicha, yanvar oyida G‘azo sektorining 80 foizdan ortiq hududida evakuatsiya qilish rejalashtirilgan.
Ma’lumot uchun, Isroil oldinroq G‘azodagi minglab fuqarolik obyektlarini buzishga kirishgandi. Xususan sun’iy yo‘ldoshdan olingan tasvirlar yahudiy harbiylari bir qancha hududlarda katta miqdordagi vayronagarchiliklar sodir etayotganini ko‘rsatgan. Yahudiy davlati bu harakatlar “operativ nazorat ostida” amalga oshirilayotganini bildirgan.
Izoh (0)