Janubiy Koreyada yashayotgan xorijliklar soni 2025-yil iyun oyida rekord ko‘rsatkich — 2,73 millionga yetdi. Ularning uchdan bir qismini xitoyliklar tashkil qilmoqda. Bu haqda Anadolu xabar berdi.
Ma’lumotlarga ko‘ra, iyun oyi oxiriga kelib mamlakatda 1,56 million nafar ro‘yxatdan o‘tgan xorijlik, shuningdek, 552 419 nafar xorij fuqaroligiga ega koreys millatiga mansub shaxslar bo‘lgan. Bundan tashqari, 620 mingdan ortiq odam Janubiy Koreyada qisqa muddatli — asosan sayyohlik vizasi bilan vaqtincha yashamoqda.
Koronavirus pandemiyasidan oldin, 2019-yilda xorijliklar soni ilk bor 2,52 million nafarga yetgandi. Biroq 2021-yilda bu ko‘rsatkich 1,96 millionga kamaygan. Keyinchalik, 2023-yil oxiriga borib bu ko‘rsatkich 2,65 millionga yetib, o‘sish sur’ati tiklangan.
Millat jihatidan tahlil qilinganda eng katta ulushni xitoyliklar — 972 176 nafar (35,6 foiz) tashkil qilmoqda. Keyingi o‘rinlarda vyetnamliklar — 341 153 nafar, amerikaliklar — 196 664 nafar, tailandliklar — 173 710 nafar va o‘zbekistonliklar — 98 457 nafar bilan qayd etilgan.
Mamlakatdagi xorijliklarning yarmi Seul va unga tutash metropoliten hududlarida, qolgan qismi esa markaziy ChungChong provinsiyasi hamda janubiy provinsiyalarda istiqomat qilmoqda. Bu aholining deyarli yarmi 20 yoshdan 39 yoshgacha bo‘lgan shaxslardan iborat.
Muhojirlarning taxminan 20 foizi F-4 vizasi — xorijdagi koreyslar uchun mo‘ljallangan vizaga ega, 12 foizi esa E-9 vizasi — malakali bo‘lmagan ishchilar uchun berilgan ruxsatnoma bilan yashamoqda. Shuningdek, F-5 (doimiy yashash), D-2 (talabalik) va B-2 (sayyohlik) vizalari asosida ham mamlakatda bo‘lib turgan xorijliklar mavjud.
Izoh (0)