Argentina hukumati aholining shikoyatlaridan so‘ng Colgate Total Active Prevention Clean Mint tish pastasining iste’moli, tarqatilishi va reklama qilinishini taqiqladi. Bu haqda Dori vositalari, oziq-ovqat mahsulotlari va tibbiy texnologiyalar sifatini nazorat qilish milliy boshqarmasi (ANMAT) xabar berdi.
Iste’molchilar tish pastasidan foydalangach og‘iz bo‘shlig‘i to‘qimalarida ta’sirlanish, yallig‘lanish, pufakchalar, yaralar, achishish, shish va og‘riq paydo bo‘layotganidan shikoyat qilgan. Hozirgacha aholidan 19 ta rasmiy murojaat kelib tushgan. Ularning barchasi aynan ushbu mahsulot turiga tegishli ekanini bildirgan.
ANMAT bu holatni nazoratga olishini ma’lum qilgan. Tashkilot aholini tish pastasidan keyin yuzaga keladigan har qanday noxush alomatlar haqida xabar berishga chaqirgan.
Bu Colgate tish pastasi atrofidagi ilk mojaro emas. 2025-yil may oyida Braziliyada ham shunga o‘xshash holat kuzatilgan edi. Mamlakatning Anvisa milliy sog‘liqni saqlash organi Colgate tish pastasining Total Clean Mint deb nomlangan turini taqiqlagan. Bunga tish milkining qichishishi, achishishi va shishishi, shuningdek, pasta qo‘llanilgandan keyin og‘riqli yaralar haqidagi shikoyatlar sabab bo‘lgan.
Pasta Braziliyada 2025-yil mart oyida sotuvdan olib tashlangan, dastlab ishlab chiqaruvchi kompaniya apellyatsiya bergan, ammo keyinchalik uni qaytarib olgan. Natijada Colgate bu mahsulotni Braziliya bozoridan butunlay olib chiqishga qaror qilgan.
Izoh (0)