Rossiyada tug‘ilish darajasi so‘nggi ikki asrdagi minimumga tushdi. Rasmiylar muammoni bartaraf etish uchun qator radikal choralarni ilgari surmoqda. “Demografik maxsus kuchlar” bo‘linmasini tuzish, bo‘ydoq erkaklarni frontga yuborish kabilar shular jumlasidan.
Federatsiya Kengashi spikeri Valentina Matviyenkoning ma’lum qilishicha, endilikda har bir hududda “demografiya uchun mas’ul rahbar” bo‘ladi. Ular “oilaviy qadriyatlarni ustuvor qilish bo‘yicha davlat siyosati”ga javob beradi.
“Bugungi kunda har bir mintaqada demografiya bo‘yicha mas’ul rahbar bor. Maxsus demografik shtab tuzildi. Umid qilamizki, an’anaviy qadriyatlarimizga qaytamiz”, degan Matviyenko.
Rossiyada demografik vaziyat og‘irlashib bormoqda. Rasmiy ma’lumotlarga ko‘ra, 2025-yilning birinchi choragida tug‘ilishlar soni 4 foizga kamayib, atigi 288,8 ming bola dunyoga kelgan. Yakunlangan 2024-yilda esa 1,2 million bola tug‘ilgan. 2023-yilgi ko‘rsatkichga nisbatan 3,4 foizlik kamayish tendensiyasi kuzatilgan.
Ukrainaga qarshi keng ko‘lamli urush qurbonlari va siyosiy ta’qiblardan qochib Rossiyani tark etganlar hisobiga vaziyat yanada og‘irlashgan. BBC rus xizmati va “Mediazona” nashrining hisob-kitoblariga ko‘ra, kamida 119 ming nafar rossiyalik Kreml boshlagan urush qurboni bo‘lgan. Biroq ro‘yxat nekrologlar va ta’ziya xatlari kabi hujjatlar bilan tasdiqlangan keyslarnigina inobatga olishini, shu bois qurbonlarning asl soni ancha yuqori bo‘lishi mumkinligini ta’kidlash joiz.
2018-yili prezident Putin “Milliy demografiya loyihasi”ni boshlab, aholining kamayishini to‘xtatishga ko‘rsatma bergan edi. O‘tgan yili u mazkur tendensiyani 2030-yilga qadar nolga tushirish maqsadini yana bir bor tasdiqladi.
Shunga qaramay, Rossiya hukumatining oilaviy qadriyatlarni targ‘ib qilish, ko‘p bolali oilalarni rag‘batlantirish va abortni cheklash kabi choralari samara bermayapti. Rasmiylar oilaviy turmushga kuchli stimul yaratish uchun bo‘ydoq erkaklarni urushga yuborish taklifini ilgari suryapti. Bu haqda Ukraina Tashqi razvedka xizmati ma’lum qildi.
Izoh (0)