AFP (Agence France-Presse) fransuz axborot agentligi rahbariyati G‘azoda faoliyat olib borayotgan muxbirlarni evakuatsiya qilishga kirishdi. Bu haqda Anadolu xabar berdi.
Evakuatsiya qilish qarori G‘azoda o‘ta kuchli ocharchilik o‘limga olib kelayotgani sabab qabul qilingan.
“Jurnalistlarning hayoti xavf ostida. Shuning uchun biz Isroil rasmiylaridan muxbirlarning oilalari bilan birga zudlik bilan evakuatsiya qilinishiga ruxsat so‘raymiz. G‘azodagi dahshatli vaziyatdan chuqur xavotirdamiz. Oylar davomida xodimlarimizning yashash sharoitlari keskin yomonlashganiga guvoh bo‘ldik. Ularning namunali jasorati, kasbiy sadoqati va matonatiga qaramay, hozirgi ahvolga chidab bo‘lmaydi”, degan agentlik rahbariyati.
2024-yilning yanvar—aprel oylarida 8 nafar AFP xodimi va ularning oilalari G‘azodan evakuatsiya qilingan edi. Agentlik ushbu muvaffaqiyatni eslatib o‘tib, yana bir bor o‘z xodimlari uchun xuddi shunday choralar ko‘rishini ta’kidlagan.
“AFP 1944-yil avgust oyida tashkil etilganidan beri turli to‘qnashuvlarda ko‘plab jurnalistlar halok bo‘lgan. Ular jarohatlanib, hatto mahbus bo‘lganiga ham guvoh bo‘lganmiz. Ammo hech birimiz xodimlar ochlikdan o‘lganini eslay olmaymiz”, deyiladi agentlikning X’dagi postida.
Committee to Protect Journalists (Jurnalistlarni himoya qilish qo‘mitasi) statistikasiga ko‘ra, G‘azoda 2023-yil 7-oktyabrda boshlangan urush davomida 186 nafar jurnalist va media xodimi halok bo‘lgan. Ulardan 176 tasi falastinlik va 2 tasi isroillik edi. Bu 2025-yil 16-iyunga qadar olingan ma’lumotlar bo‘lib, qo‘mita hozirda yana 130 dan ortiq holatni tekshirishni davom ettirmoqda.
Izoh (0)