Sloveniya hukumati 31-iyul kuni Isroilning qurol-yarog‘ eksporti, importi va tranzitiga embargo qo‘yganini ma’lum qildi. Bu qaror bilan mamlakat G‘azo urushi fonida Isroil qurollariga cheklov o‘rnatgan Yevropadagi ilk davlat bo‘ldi. Bu haqda Daily Sabah xabar berdi.
Bosh vazir Robert Golob hukumat yig‘ilishidan so‘ng bu cheklov haqida e’lon qilar ekan, Yevropa Ittifoqi ichidagi kelishmovchiliklar sababli Sloveniya bu masalada mustaqil tarzda harakat qilishga qaror qilganini ta’kidlagan.
“G‘azo sektorida insonlar yordamdan ataylab mahrum qilinayotgani bois halok bo‘lmoqda. Bunday vaziyatda har bir mas’ul davlat chora ko‘rishi kerak — boshqalardan oldin bo‘lsa ham,” deyiladi bayonotda.
Ma’lum bo‘lishicha, Sloveniyaning o‘zi ham 2023-yil oktyabr oyidan buyon, ya’ni G‘azoda urush boshlanganidan beri Isroilga harbiy texnikalar yetkazib berishni to‘xtatgan.
Ma’lumot uchun, Sloveniya 2024-yilning iyun oyida Falastin davlatini rasman tan olgan. Shuningdek, mamlakat iyul oyida 2 nafar isroillik vazirni “persona non grata” (nomaqbul shaxs) deb e’lon qilib, ularning Sloveniyaga kirishini taqiqlagan. Vazirlar genotsidga undovchi bayonotlar berganlikda ayblangan. Sloveniya va Isroil o‘rtasida ilk bora 1992-yilda diplomatik aloqalar o‘rnatilgandi.
Izoh (0)