Kipr so‘nggi 50 yillikdagi eng yirik o‘rmon yong‘inlari bilan kurashmoqda. Bugungacha mamlakat hududida 120 kvadrat kilometr maydon yonib ketdi. Bu haqda Euronews xabar berdi.
O‘t o‘chiruvchilarning xabar qilishicha, 23-iyul kuni yong‘indan zarar ko‘rgan qishloq tepaliklaridan birida kuygan mashina va uning ichida 2 kishining jasadi topilgan. Yana 2 kishi jiddiy kuyish jarohatlari bilan Nikosiya bosh kasalxonasiga olib ketilgan. Ularning ahvoli og‘ir deb baholanmoqda. Hammasi bo‘lib 10 kishi jarohatlangan. Shuningdek, yong‘in oqibatida 14 kilometr uzunlikdagi tog‘li hududda 14 ta qishloq aholisi evakuatsiya qilingan. Lofou qishlog‘ida kamida 20 ta uy vayron bo‘lgani aytildi.
Hukumat rasmiylari 24-iyul kuni ertalab faol yong‘inlar bartaraf etilganini ma’lum qilgan bo‘lsa-da, keyinchalik ba’zi hududlarda yong‘in qayta alangalangan. Jumladan, shu kuni tushdan keyin g‘arbiy Pafos tumanida yana o‘rmon yong‘inlari qayd etilgan.
Mutaxassislar kunduzi qattiq shamol esishi va jazirama issiq bilan qo‘shilib, vaziyat yanada xavfli tus olishidan ogohlantirdi. Hozirda ko‘plab yo‘llar yopiqligicha qolmoqda, fuqarolarni qutqarish ishlari davom etmoqda. 250 dan ortiq o‘t o‘chiruvchi yong‘inni o‘chirish bilan shug‘ullanayotgani xabar qilindi. Shuningdek, 18 ta samolyot havodan yordam bermoqda.
Yuqorida aytilganidek, 23-iyul kuni boshlangan o‘rmon yong‘inlari kamida 120 kvadrat kilometr maydonni kul qilgan. Bu yer maydoni orol quruqlik hajmining 1 foizidan ko‘prog‘ini tashkil etadi. So‘nggi marotaba yirik yong‘inlar 1974-yili orol turk harbiylari tomonidan bosib olinganda sodir bo‘lgandi. O‘shanda 260 kvadrat kilometrga yaqin maydon yonib ketgan.
Xorijiy yordam
Kipr hukumati matbuot kotibi Konstantinos Letimbiotisning aytishicha, mamlakat boshqa davlatlardan yordam so‘ragan.
“Ispaniya 2 ta yong‘in o‘chirish samolyotini yubormoqda. Iordaniya esa 2 ta vertolyoti bilan yordam ko‘rsatishga bel bog‘ladi. Buyuk Britaniya ham o‘zining harbiy samoyotlarini yong‘inni o‘chirishga safarbar qildi. Bu orada Isroil 24-iyul kuni kechqurun o‘z samolyotlarini yuborishini ma’lum qildi”, dedi matbuot kotibi.
Izoh (0)