“Biz bunga yo‘l qo‘ymaymiz” — Qamchibek Tashiyev “Do‘stlik” postida korrupsiyani oldini olish bo‘yicha topshiriq berdi

Qirg‘iziston va O‘zbekiston o‘rtasidagi “Do‘stlik” chegara bojxona postida korrupsiya holatlari to‘xtagan. Bu haqda Qirg‘iziston Vazirlar Mahkamasi raisi o‘rinbosari — Milliy xavfsizlik qo‘mitasi rahbari Qamchibek Tashiyev 8-iyul kuni O‘sh viloyatiga qilgan tashrifi chog‘ida maʼlum qilindi, deya xabar bermoqda “Telekanal region”.

 Masʼullar bilan muloqotda Qamchibek Tashiyevning “Kirgan-chiqqanlardan — piyodalar, avtomashinalardan pul olish to‘xtadimi?”, degan savoliga chegara-bojxona posti rahbarlari “To‘xtagan”, deb javob berdi.

Agar qarasangiz to‘xtaydi. Siz qaramay qo‘ysangiz bir-biriga ulanib ketaveradi. Faqat chegarachilar emas, bojxonachilar ham javobgar.

Hech qanday korrupsiya yo‘q, kirgan-chiqqan mashinalardan, tovarlardan, odamlardan hech narsa olingani yo‘q, aniqmi? Televideniye tasvirga olyapti. Ertaga menga kimdir shikoyat qilsa, javob berasiz. Shuning uchun yaxshilab qaranglar. Bu o‘yin yoki oddiy ko‘rsatma emas.

Shunchaki ishlash yoki qandaydir yo‘l bilan pul qilish haqida o‘ylamang. Bu umuman bo‘lmaydi va bunga yo‘l ham qo‘ymaymiz. Agar eplolmasanglar, o‘rninglarga boshqalar keladi, dedi Milliy xavfsizlik qo‘mitasi rahbari.

Tashrif davomida Qamchibek Tashiyev O‘sh viloyati ichki ishlar boshlig‘iga O‘zbekistondan o‘tayotgan shaxslar bilan bog‘liq muammolar bo‘lmasligi, tinch kelib-ketishlari uchun sharoit yaratish bo‘yicha topshiriq bergan.