Argentinada harbiy to‘ntarish davrida o‘g‘irlangan chaqaloq 48 yildan so‘ng topildi

Argentinada harbiy to‘ntarish davrida tutqun onasidan majburan tortib olingan chaqaloq 48 yildan so‘ng topildi. Bu haqda BBC xabar berdi.

Begonalarning qo‘lida tarbiya topgan erkakning shaxsiga DNK testi orqali aniqlik kiritilgan. Erkakning singlisi Adriana Metsning aytishicha, u uzoq yillar davomida yo‘qolgan ukasini qidirgan. O‘tgan hafta opa-uka ilk bor ko‘rishib, gaplashgan.

Mets ukasini topishda Plaza de Mayo guruhi yordamiga tayangan. Bu tashkilot uzoq vaqtdan beri harbiy xunta tomonidan o‘g‘irlangan taxminan 500 nafar chaqaloqni oilalari bilan birlashtirishga urinadi. Metzning ukasi esa topilgan bir yuz qirqinchi chaqaloq sanaladi. Uning ismi xavfsizlik maqsadida oshkor etilmagan.

Tashkilot “140-nabira” deb atagan erkak tashkilot ko‘rsatuvida ishtirok etmagan bo‘lsa-da, uning oilasidan qanday ajralib qolgani haqida batafsil ma’lumot berilgan. Erkakning ota-onasi Buenos Ayres provinsiyasidagi Baiya Blanka shahrida siyosiy faol bo‘lib faoliyat yuritgan.

Uning otasi Raul Mets o‘z otasining izidan borib, temiryo‘l sohasida ishlagan. Shu bilan birga kommunistik partiyaning faol a’zosi bo‘lgan. Uning onasi Graciela Romero esa iqtisod bo‘yicha tahsil olgan va Marksist partizan guruhi PRT-ERP’ga qo‘shilgan.

Juftlikning Adriana ismli qizi bor edi. Graciela Romero 1976-yil dekabr oyida o‘z uyida hibsga olinganida ikkinchi farzandiga besh oylik homilador bo‘lgan.

1976-yil mart oyida harbiy xunta to‘ntarish o‘tkazib, o‘z hukmronligiga qarshi har qanday muxolifatni yo‘q qilishga harakat qilgan. O‘n minglab kishilar reydlarda qo‘lga olinib, maxfiy hibsxonalarda saqlangan. Ko‘pchilik qiynoqqa solingan. Graciela Romero 1977-yil 17-aprelda La Escuelita (Kichik maktab) deb nomlanuvchi yashirin hibsxonada asirlikda o‘g‘il farzand dunyoga keltirgan. Hisob-kitoblariga ko‘ra, 1976-1983-yillar davomida harbiy to‘ntarishda 30 000 ga yaqin odam halok bo‘lgan.