Kolumbiyada 10-iyun kuni mamlakatning janubi-g‘arbiy qismida portlashlar to‘lqini sodir bo‘ldi. Bu haqda CNN xabar berdi.
Rasmiylarning aytishicha, mamlakat politsiyasiga qarshi uyushtirilgan deb taxmin qilingan hujumda kamida 7 kishi halok bo‘lgan. Kolumbiya milliy armiyasi portlashlar Kali shahri hamda Kauka va Vale-del-Kauka departamentlaridagi bir nechta shaharlarda sodir bo‘lganini ma’lum qilgan.
Kolumbiya milliy politsiyasi kun davomida 20 dan ortiq “terrorchilik hujumlari”, jumladan, avtomobillarda portlashlar, o‘qotar qurollar bilan hujumlar va portlovchi qurilmalarning ishga tushirilishi haqida xabar bergan. Halok bo‘lganlar orasida kamida 2 nafar ofitser, yaralangan 28 kishi orasida esa tinch aholi vakillari, harbiylar va politsiya ham borligi aytilgan.
Armiyaning ta’kidlashicha, hujumlarni jangarilar fraksiyalaridan biri bo‘lgan Estado Mayor Central partizan guruhi rahbari uyushtirgan. Ammo isbot va dalillar taqdim etilmagan. Oldinroq mamlakatda FARC isyonchilari Kolumbiya hukumati bilan tinchlik shartnomasini imzolagan edi.
Estado Mayor Central hujum uchun javobgarlikni o‘z zimmasiga olmagan. 10-iyun kungi bayonotida guruh Kolumbiya hukumatini tinchlikdan voz kechishda ayblagan va tinch aholiga o‘zaro otishmalardan qochish bo‘yicha maslahat bergandi.
Kolumbiyaning uchinchi yirik shahri hisoblangan Kalida shahar meri Alexandro Eder 10-iyun kuni 3 ta portlovchi qurilma ishga tushirilganini aytgan. Harbiylar 6 ta hujumning oldini olib, portlovchi modda tayyorlayotgan 2 kishini qo‘lga olgan.
Ederga ko‘ra, portlashlar Kalining Los Mangos hududida, Melendez politsiya bo‘limi yaqinida, yana biri esa Manuela Beltran tezkor markazida qayd etilgan. Vaziyat endi nazorat ostidaligi bildirilgan. Xavfsizlik kuchlarini butun shahar bo‘ylab joylashtirish buyurilgan.
“Ular bizni 1989-yilga qaytarishmoqchi. Biz bunga yo‘l qo‘ymaymiz!”, dedi Eder Kolumbiyadagi shiddatli zo‘ravonlik, jumladan, prezidentlikka nomzod Luis Karlos Galanning o‘ldirilishi davriga ishora qilib.
Izoh (0)