Rossiya poytaxti Moskvada noqonuniy migrantlarni aniqlash bo‘yicha navbatdagi reydlar o‘tkazildi. Bu haqda Tergov qo‘mitasi xabar berdi.
Reyd davomida shahardagi xostellar va ibodatxonalar tekshirilgan. Ushbu obyektlardagi 500 dan ortiq muhojir tekshiruv uchun politsiyaga olib ketilgan. Rossiyaga kirish va mamlakatda bo‘lish qoidalarini buzgan 30 dan ortiq kishi ma’muriy javobgarlikka tortilgan va chiqarib yuborilgan. Bundan tashqari, federal qidiruvda bo‘lgan bir nafar migrant qo‘lga olingan.
Tergov qo‘mitasi reydlar aynan qachon o‘tkazilgani va qaysi davlatlar fuqarolari Rossiyadan chiqarib yuborilganiga aniqlik kiritmagan.
Moskvada 2024-yil 22-mart kuni Crocus City Hall konsert zalida sodir etilgan terakt migrantlarga nisbatan tekshiruv kuchayishiga sabab bo‘ldi. Rossiya hukumati bir necha Tojikiston fuqarolarini terakt tashkilotchilari deb atadi. Shundan so‘ng bozorlar, masjidlar, hammomlar va kafelarda muhojirlarga qarshi reydlar o‘tkazildi. Rossiya Tashqi ishlar vazirligi hammomda migrantlarni kaltaklagan xavfsizlik kuchlarini oqlab chiqdi. Vazirlikka ko‘ra, bu reydda “rejali tekshiruv” o‘tkazilgan va “qonun hujjatlariga muvofiq” harakat qilingan.
Rossiyadagi reydda o‘zbekistonliklarga jismoniy kuch ishlatilgan
8-iyun kuni Moskvada o‘tkazilgan reydda mehnat faoliyatini olib borayotgan O‘zbekiston fuqarolariga nisbatan OMON jismoniy kuch qo‘llagandi. Migratsiya agentligining Rossiyadagi vakolatxonasi jabrlanganlar orasida O‘zbekiston fuqarolari bo‘lsa, jumladan, ularga tan jarohatlari yetkazilgan, huquqlari buzilgan yoki boshqa muammolarga duch kelgan bo‘lsa, murojaat qilishni so‘ragandi.
Muhojirlarga nisbatan shafqatsiz munosabat ortidan O‘zbekiston Tashqi ishlar vazirligi Rossiyaga nota yuborgandi. Unda holatga izoh berish, kuch ishlatar tashkilot vakillarining harakatlariga huquqiy baho berish so‘ralgan.
Shundan so‘ng Rossiya Tashqi ishlar vazirligi vakili Mariya Zaxarova nota diqqat bilan o‘rganilishini aytgandi. U o‘zbekistonlik hamkorlarning tegishli so‘rovi vakolatli organlarga yetkazilganini bildirgan. Olingan obyektiv ma’lumotlar belgilangan tartibda Toshkentga yuborilishi ta’kidlangan.
2025-yil aprel oyi oxirlarida Rossiyada o‘zbek migrantlari huquqlariga rioya etilishi nazorati kuchaytirilishi ma’lum qilingandi. Ikki davlat Bosh prokuraturalari migrantlarning huquqlariga rioya etilishi ustidan nazorat va kuzatuvni kuchaytirish majburiyatini olgandi. Iyun oyining o‘rtalarida prezident Vladimir Putin Rossiya va O‘zbekiston migratsiya masalalarini birgalikda hal qilishga, muhojirlarni oldindan tayyorlashga kelishib olganini aytgan.
Izoh (0)