Saudiya Arabistoni bu yil havo harorati 40 darajadan yuqori bo‘lishini hisobga olgan holda Makkada qo‘shimcha choralar ko‘rayotganini ma’lum qildi. Bu haqda Euro News xabar berdi.
2024-yili havo harorati 47 darajagacha ko‘tarilib, 1 300 dan ortiq kishi Makkada halok bo‘lgan edi. Mamlakat rasmiylari tashrif buyuruvchilarning xavfsizligini ta’minlash uchun qo‘shimcha choralar ko‘rmoqda.
Bu yil Ar-Riyod olomonni nazorat qilish va sovitish tizimlari uchun milliardlab dollar sarflagan. Masjidul Haromda o‘rnatilgan dunyodagi eng yirik sovitish tizimi ziyoratchilarga 22-24 daraja haroratda amallarni bajarish imkoniyatini beradi.
Shuningdek, ziyoratchilarga zarurat bo‘lmaganda kunduzi tashqariga chiqmaslik va boshni asrash tavsiya etilgan. Ziyoratchilarga nima olib kelish va qanday kiyinish bo‘yicha xavfsizlik to‘plami taqdim etiladi. Unda quyosh urishi va suvsizlik holatlarida qanday yo‘l tutish kerakligi ham tushuntirilgan bo‘ladi. Bu yilgi hajga 12 yoshgacha bo‘lgan bolalarning ishtirok etishiga taqiq joriy qilingan.
Ma’lumot o‘rnida, Saudiya Arabistoniga 2025-yilgi haj mavsumi uchun xorijdan bir milliondan ortiq ziyoratchi kelgan. Hajga kelganlarning 53 foizi erkaklar, 47 foizi esa ayollardir. Ziyoratchilarning 94 foizi havo yo‘li bilan, 4,83 foizi quruqlikdagi chegara punktlari orqali, taxminan, 0,5 foizi esa dengiz orqali yetib kelgan.
Izoh (0)