Koreyslarning yuz terisi parvarishi kun sayin ommalashmoqda. Ko‘pchilik ularning mato niqoblarini hech bo‘lmasa bir marta sinab ko‘rgan. Koreyalik ayollarning silliq terisi hammani hayratda qoldiradi. Maqolada yuz terisi parvarishida foydali bo‘ladigan bir nechta oddiy qoidalar haqida so‘z boradi.
Ikki bosqichli tozalash
Koreyalik ayollar hech qachon makiyaj bilan uxlamaydi: bu teriga juda zararli. Koreyslar yuzini oddiy suv va sovun bilan yuvmaydi. Ularning parvarish jarayoni bir necha bosqichda amalga oshiriladi. Bu yuzni tozalashga ham tegishli. Tongda yoki kechqurun yuzni tozalashdan qat’iy nazar, avvalo gidrofil yog‘idan foydalanish kerak. U makiyaj va quyoshdan himoya kremi qoldiqlarini mukammal olib tashlaydi, ortiqcha yog‘ va o‘lik teri hujayralari bilan osongina kurashadi.
Keyin esa, suv asosidagi har qanday vositadan foydalanish mumkin. Bu teridagi chang, ter va boshqa krem qoldiqlarini tozalaydi. Ko‘plab mutaxassislar buning uchun yuzni yuvish kukuni (pudrasi)ni tavsiya qiladi.
Yuzni tozalashdan oldin qo‘llarni yuvish ham juda muhim bosqichdir. Agar bu kichik narsani unutib qo‘ysangiz, foydali parvarish o‘rniga yuzga mikroblarni surtib olishingiz mumkin.
Namlantiruvchi niqoblar
Koreyslarning mato niqoblaridan foydalanishi aslida yangilik emas. Ular ko‘p yillardan beri mashhur. Qulay qadoq, namlovchi vosita yoki serumlarga botirilgan niqob va 15 daqiqalik dam olish: Bundan yaxshi nima bo‘lishi mumkin? Bunday parvarish haftasiga 1-2 marta teringizga kuchli oziqlantirish va chuqur namlanishni ta’minlaydi. Mato niqoblarning aynan yopishqoqlik xususiyatlari ularni samarali qiladi.
So‘nggi paytlarda mato niqoblar bilan bir qatorda tungi niqoblar ham mashhur bo‘lib bormoqda. Ular qalin krem yoki gelga o‘xshaydi. Bu niqoblarni tun bo‘yi yoki qisqa vaqt davomida qo‘llash mumkin. Mato niqoblar kabi, tungi niqoblar ham terini yaxshi namlaydi, uni yanada mayin va silliq qiladi. Albatta, har ikkisini ham teri turiga moslab tanlash tavsiya etiladi.
Koreys ayollaridan terini parvarish qilish yoki makiyaj vositalarini qo‘llash usuli bo‘yicha foydali maslahatni o‘rganish mumkin.
Ratsionda kimchining mavjudligi
Ko‘p hollarda terining sog‘ligi faqat ishlatiladigan kremning sifatiga emas, balki nimani yeyishimizga ham bog‘liq. Kimchi — koreyslarning an’anaviy yeguligi bo‘lib, tuzlangan sabzavotlardan iborat garnirdir. Ko‘pincha bu karam yoki rediska bo‘ladi. Ammo kimchi oddiy yegulik emas. U hazm qilish tizimi uchun foydali bo‘lgan probiotiklar manbai hisoblanadi.
Sabzavotlarning kislotalanishi teriga qanday yordam beradi? Hammasi oddiy: ichakning holati to‘g‘ridan-to‘g‘ri terining holatiga ta’sir qiladi. Agar hazm qilish bilan bog‘liq muammolar yuzaga kelsa, terida turli toshmalar paydo bo‘ladi. Probiotiklar ichakdagi mikroorganizmlar muvozanatini tiklaydi, demak, teri ham yaxshiroq ko‘rinishga ega bo‘ladi.
Bundan tashqari, kimchi to‘g‘ridan-to‘g‘ri teri uchun ham foydalidir. Probiotiklar organizmdagi yallig‘lanish jarayonlarini kamaytiradi va akne, ekzema yoki rozatsiya kabi teri kasalliklari bilan kurasha oladi. Shuningdek, surunkali yallig‘lanish kollagenning kamayishiga olib kelishi mumkin.
Probiotiklar terining himoya funksiyalarini yaxshilashi mumkin. Ular teridagi namlikni ushlab turishga yordam beruvchi lipidlar va seramidlarga ta’sir ko‘rsatadi hamda atrof-muhitning zararli ta’siridan himoya qiladi.
Ammo qanday qilib o‘z ratsionimizga shu qadar ko‘p tuzlangan sabzavotlarni qo‘shamiz? Kimchini tuxum yoki sho‘rvaga qo‘shib ko‘ring — shunda nafaqat sog‘ligingiz uchun foyda olasiz, balki oddiy taomlarga yangi ta’m ham qo‘shasiz.
Albatta, faqat kimchi bilan sog‘lom teriga erishib bo‘lmaydi. Teri yaxshi holatda bo‘lishi uchun yetarlicha suv ichish va yaxshi uxlab olish ham muhimdir. Ammo bu qoidalarni to‘g‘ri bajarib, sifatli teri parvarishini ham qo‘shsangiz, teringiz yaltiraydi.
Yuz uchun massaj va gimnastika
Yuz yogasi — bu avvalo o‘zingizga g‘amxo‘rlik qilishdir. An’anaviy koreys mashqlar texnikasi yuzdagi muhim mushaklarni ishlatishga yordam beradi va shuning uchun teringiz “tiriladi”. Bundan tashqari, ushbu mashqlar davomida nafaqat dam olish, balki go‘zallik haqida o‘ylash ham mumkin.
Massaj uchun turli asbob-uskunalardan foydalanish mumkin. Guash yuz chiziqlarini shakllantirishda yordam beradi, nefrit yoki muzli rollerlar esa shishlarni kamaytiradi va stressni yengillashtiradi. Bundan tashqari, Koreyada hozir limfodrenaj massaji juda mashhur bo‘lib, u yuz shaklini yaxshilaydi va hatto asimmetriyani ham to‘g‘rilashi mumkin.
Yetti bosqichli usul
Ushbu usul teriga tonerni yetti marta surishni nazarda tutadi. Hech qanday murakkablik yo‘q. Asosiysi shundaki, agar biz odatdagidek tonerni bir marta surtsak, teri hammasini shimib olishdan oldin, mahsulotning bir qismi havoga uchib ketadi. Qatlamlash esa terining imkon qadar ko‘proq foydali moddalarni qabul qilishiga yordam beradi. Bu nafaqat toner, balki tonik, essensiya va serumlarga ham tegishlidir.
Mana shunday oddiy usul yordamida teringiz har kuni go‘yo kosmetologdan chiqqandek yaltiraydi. Eng muhimi — siz ko‘p vaqt va pul sarflashingiz shart emas. Terini tozalagandan so‘ng, paxta diski yordamida namlik biroz qolgan yuzga mos keladigan tonerdan birinchi qatlamni surting. Muhim tomoni, mahsulotda spirt yoki boshqa zararli kimyoviy moddalar bo‘lmasligi, balki namlovchi va tinchlantiruvchi ta’sirga ega bo‘lishidir. Tonerni barmoqlar bilan sekin surish ham mumkin.
Keyin birinchi bosqichni yana olti marta takrorlang. Qatlamlar soni har doim yettita bo‘lishi shart emas. Vaqt o‘tishi bilan siz tonerni necha marta surish kerakligini, teringiz uchun qaysi darajada ideal namlik hosil bo‘lishini bilib olasiz. Ba’zi mutaxassislar bir xil tonerni emas, balki bir nechta turini ketma-ket surishni tavsiya qiladi. Asosiysi, ular hidli bo‘lmasligi va terini dag‘allashtiruvchi yoki quruqlashtiruvchi ta’sirga ega bo‘lmasligi kerak. Yetti qatlam usulining asosiy vazifasi — terini chuqur va samarali namlantirishdir.
Guruch asosidagi vositalar
Guruch tarkibli parvarish kosmetikasi namlovchi, antioksidant va terini oqartiruvchi xususiyatlarga ega. U erta qarishga qarshi samarali kurashadi. Masalan, guruch suvi asrlar davomida Osiyo go‘zallik marosimlarida qo‘llanilib kelgan. Hali bu vositaning noyobligi ilmiy jihatdan isbotlanmagan bo‘lsa-da, u albatta yallig‘lanishni kamaytiradi va terini tinchlantiradi.
Shilliqurt suyuqligi
Bir necha yildan beri shilliqurt suyuqligi asosidagi teri parvarishi vositalari butun dunyo bo‘ylab mashhur bo‘lib kelmoqda. Bunga hayron qolmaslik kerak. Chunki uning tarkibiy qismi gialuron kislotalari, proteinlar, mis va antimikrobli peptidlar, antioksidantlarga boy. Shilliqurt suyuqligi terini yaxshi namlay oladi. Suyuqlik miqdori ko‘p bo‘lgan mahsulotlarni tanlang. Bu toniklar, krem va mato niqoblar bo‘lishi mumkin. Shunday qilib, teringizdagi bezovtalik kamayadi.
Quyoshdan himoyalovchi krem
SPF (quyoshdan himoya qiluvchi vositalar) ishlatish — haqiqiy koreys an’anasi hisoblanadi. Har kuni quyoshdan himoya qilish terini parvarish qilishning ajralmas qismidir. Bu terining sog‘lom va porloq qolishini iloji boricha uzoqroq ta’minlaydi. Ko‘p hollarda ayollar quyosh kremi yog‘lilik darajasidan norozi bo‘ladi. Ba’zilari yog‘li, ba’zilari suyuq, yana ba’zilari esa terida juda qalin tuyuladi. Texnologiyalar rivojlanmoqda va do‘konlarda tobora ko‘proq yengil tarkibga ega SPF mahsulotlarini uchratish mumkin.
Bo‘yinni ham unutmang: koreyalik ayollar terini parvarishlashda jag‘ sohasida to‘xtamaydi. Yuzga surtadigan barcha vositalarni bo‘yinga surtish mumkin va kerak. Bu toner, serum, krem va hatto mato niqoblarga ham tegishli.
Izoh (0)