Mikroto‘lqinli pech bugungi kunda deyarli har bir xonadonda mavjud. Undan taomni bir necha daqiqada isitish yoki muzlagan go‘shtni eritishda keng foydalaniladi. Biroq ko‘pchilik uy bekalari mikroto‘lqinli pechdan foydalanishda ayrim xatolarga yo‘l qo‘yadi va hatto foydalanish haqidagi yo‘riqnoma bilan tanishib chiqmaydi. Shuningdek, pechda juda kam miqdordagi mahsulotni isitadi. Quyida bunday odat nimaga olib kelishi va bir stakan suv bilan muammoni qanday hal qilish mumkinligi haqida so‘z boradi.
Mikroto‘lqinli pech qanday ishlaydi?
Ko‘pchilik hanuzgacha mikroto‘lqinli pechni bo‘sh holda ishga tushirish mumkin emasligini bilmaydi. Yoki hajmi juda kichik mahsulotlarni, masalan, 100 grammli sendvichni isitish ham xavfli ekanini xayoliga ham keltirmaydi. Vaqt o‘tishi bilan bunday holatlar pechdagi jiddiy nosozlikka olib keladi.
Mikroto‘lqinli pechda maxsus magnetron bo‘lib, aynan u ovqatni isituvchi mikroto‘lqinlarni hosil qiladi. Magnetron elektr kuchlanishining yuqori intensivlikdagi qisqa impulslari bilan boshqariladi. Har bir impulsdan so‘ng u mikroto‘lqin hosil qiladi va bu to‘lqinlar maxsus yo‘naltirgich orqali pechning ichki kamerasiga uzatiladi.
Agar pech ichida yetarli miqdorda ovqat bo‘lsa, mikroto‘lqinlar ovqatdagi suv molekulalari bilan to‘qnashib, isitish jarayoni boshlanadi. Ammo pech ichi bo‘sh yoki ichidagi mahsulot hajmi juda kichik bo‘lsa, bunday holda mikroto‘lqinlar so‘rilish uchun manba topa olmaydi. Ular pech devorlariga urilib, ortga qaytadi va bu “turg‘un to‘lqinlar” deb ataluvchi holatga olib keladi. Bunday paytda mikroto‘lqinli pech ichida uchqunlar chiqadi. Bunday holat qayta-qayta davom etaversa, magnetron ishdan chiqishi mumkin.
Suv solingan stakan nima uchun kerak?
Shu sababli mutaxassislar, agar ovqat juda kam bo‘lsa, pech ichiga sovuq suv to‘ldirilgan stakan qo‘yishni tavsiya etishadi. Suv ortiqcha mikroto‘lqinlarni so‘rib oladi, bu esa xavfli uchqunlar hosil bo‘lishining oldini oladi.
Albatta, mikroto‘lqinli pechni bir marta bo‘sh holda yoqish bilan darrov jiddiy narsa sodir bo‘lmasligi mumkin, lekin bu odat takrorlanaversa yoki tez-tez oz miqdordagi ovqat isitilsa, magnetronning ishlash muddati sezilarli darajada qisqaradi. Shuning uchun, keyingi safar faqat bitta sendvich isitmoqchi bo‘lsangiz, yoniga albatta suv solingan stakan qo‘yishni unutmang.
Izoh (0)