Qozog‘istonlik 22 yoshli Chingiz Algazin tasodifan “virusli” video yozib oldi va jahon miqyosidagi modelga aylandi. U o‘z hikoyasini Instagram ijtimoiy tarmog‘ida baham ko‘rdi.
2024-yilda Chingiz avtobusda o‘zini videoga olayotganda to‘satdan keksa ayol unga hujum qilgan: u “Meni suratga olishni bas qil” deb baqirib, uni sumkachasi bilan ura boshlagan.
Yigit vaziyatdan xafa bo‘lmay, avtobusdagi videoni ijtimoiy tarmoqlarga joylashtirdi. Tez orada video tarmoqlarda keng tarqalib, moda olamidagilarning eʼtiborini tortdi.
Yigit bilan Qozog‘istonning Mulan modellar agentligi bog‘landi, u yerda bepul taʼlim oldi va agentlik bilan hamkorlik qila boshladi.
Biroq bu hali hammasi emas. Yaqinda Chingiz dunyodagi eng yirik modellar agentliklaridan biri bo‘lgan IMG Models bilan shartnoma imzoladi. Bu agentlik Bella va Jiji Hadid, Tayra Benks, Haydi Klum, Sasha Pivovarova va Keyt Moss kabi podium yulduzlarini namoyish etadi.
Yigit yangi videoda o‘z hikoyasini so‘zlab berdi:
“Men hayratdaman. Hozir viza tayyorlayapman va sentyabr oyida meni Milan yoki Parij podiumlarida ko‘rishingiz mumkin bo‘ladi”, dedi Chingiz va nima bo‘lishidan qatʼi nazar, har bir insonni o‘ziga ishonishga chaqirdi.
“Agar kimdir sizga sendan qanaqa model chiqadi, desa, quloq solmang. Shunchaki o‘zingizga ishoning. Men uddaladim, siz ham uddalaysiz”, deb taʼkidladi Chingiz.
Izoh (0)