Jazirama yoz ham kirib keldi, bu fasl faqat kiyimlar emas, balki kayfiyat va, albatta, atir tanlovini ham o‘zgartiradigan davr. Ammo parfyumeriya do‘konida yurib, tanlovda adashish hech gap emas: atirlarning ba’zilari haddan tashqari shirin, boshqalari tez uchib ketadi, qolganlari esa didingizga umuman to‘g‘ri kelmasligi mumkin. Shu bois quyidagi 3 maslahatni eslab qoling, ular yoz uchun eng mos atirni topishda asqatadi.
1. Yengil va tetiklantiruvchi iforlarga ustunlik bering
Yoz issig‘ida foydalaniladigan atir yengil iforli bo‘lishi, tetiklantirishi va kayfiyatni ko‘tarishi kerak. Buning uchun sitrus, yashil, akvatik (ya’ni dengiz havosini eslatuvchi), mevali yoki gulli notalar asosidagi kompozitsiyalar ayni muddao. Bunday iforlar haddan ortiq kuchli bo‘lmaydi, me’daga tegmaydi, havoda yengil taraladi va yozgi kunlarga mos tushadi.
Issiq ob-havoda hidlar ancha faolroq taraladi. Ayniqsa kuchli iforli, o‘tkir yoki o‘ta shirin atirlar issiq kunlarda sizga ham, atrofdagilarga ham yoqimsiz bo‘lib qolishi mumkin.
2. Sotib olishdan oldin sinab ko‘ring
Atirni xarid qilishga shoshilmang. Avval uni sinab ko‘rish kerak. Flakonni hidlab yoki qog‘ozga sepib xulosa chiqarish noto‘g‘ri, chunki bu usul iforning terida taralishini ko‘rsatib bermaydi. To‘g‘ri usul bu atirni bilakka sepish va kamida 2 soat kutishdir. Bu vaqtda siz sayr qilib kelishingiz mumkin.
Parfyumlar uch bosqichda taraladi: birinchi daqiqalarda — yuqori notalar, keyin — asosiy notalar va oxirida — barqaror ifor taraladi. Bir necha soat ichida atirning haqiqiy ifori qanday ekanini to‘liq his qilasiz.
3. Qaysi turdagi atirni tanlash kerak?
Har bir flakon ustida ko‘rsatilgan yozuvga e’tibor bering:
- Parfyum (duxi) — 6-8 soat saqlanadi, tarkibida 30% gacha efir moyi bo‘ladi.
- Eau de parfum (parfyumeriya suvi) — 15-20% konsentratsiyaga ega, taxminan 4-6 soatgacha ifor taratadi.
- Eau de toilette (tualet suvi) — 5-15% efir moyi, 2-4 soatga yetadi.
- Eau de cologne (odekolon) — eng yengil atir turi, u 2-4% efir moyiga ega bo‘lib, hidi uzoq saqlanmaydi.
Yozda kundalik foydalanish uchun aynan tualet suvi yoki odekolon mos keladi. Kuchli iforga ega parfyumni kuz va qishga qoldirgan ma’qul.
Izoh (0)