O‘zbekistonda 20-iyuldan shaxsiy maqsadda tovarlarni bojsiz olib kirish uchun xorijda belgilangan muddatlar bo‘lish tartibi kuchga kiradi. Bu haqda Bojxona qo‘mitasi eslatma bilan chiqdi.
Hukumat qarori bilan 2025-yil 1-maydan boshlab jismoniy shaxslar tomonidan shaxsiy ehtiyoji uchun notijorat maqsadlarida respublikaga olib kiriladigan tovarlarning bojsiz olib kirish normalari belgilangan edi.
Jumladan,
- havo transportida — 1000 AQSH dollari,
- temiryo‘l va daryo transportida — 500 AQSH dollari,
- avtomobil va piyoda o‘tkazish punktlari orqali — 300 AQSH dollarigacha
- qiymatdagi tovarlarni shaxsiy ehtiyoj uchun bojsiz olib kirish mumkin.
Yangi tartibga ko‘ra, bojsiz olib kirish imtiyozidan foydalanish uchun temiryo‘l hamda avtomobil o‘tkazish punktlari orqali tovarlarni olib kirayotgan fuqarolar chet elda kamida ikki kun, samolyotda qaytayotganlar esa kamida uch kun bo‘lishi kerak. Bu muddat kam bo‘lsa, bojsiz olib kirish normalari qo‘llanilmaydi va tovarning to‘liq qiymatidan yagona bojxona to‘lovi undiriladi.
Bojxona chegarasi orqali olib o‘tiladigan tovarlarning bojxona qiymati esa cheklar, kvitansiyalar yoki boshqa tijorat hujjatlari asosida aniqlanadi. Agar tasdiqlovchi hujjat va ma’lumotlar taqdim etilmasa, qiymat axborot dasturlari orqali ilgari olib kirilgan shu turdagi tovarlar ma’lumotlari asosida aniqlanadi.
Qo‘mita matbuot xizmati rahbari Husan Tangriyev 23-aprel kuni AOKAda o‘tkazilgan brifingda havo yo‘llari orqali tijorat tovarlarini shaxsiy ehtiyoj niqobi ostida olib kirayotgan yo‘lovchilar soni ortganini ma’lum qilgandi. Toshkent xalqaro aeroportida bu 500 nafarni tashkil etsa, bu ko‘rsatkich mamlakat bo‘ylab 10 ming nafardan oshishini aytgandi.
“Ayrim fuqarolar 90 kun davomida 90 marta, ya’ni har kuni chet elga uchish bilan shug‘ullanib, tovarlarni bojlarsiz olib kirishni kasbga aylantirishgan, albatta bu holatni tabiiy deb bo‘lmaydi va belgilangan imkoniyatlarni suiiste’mol qilishdan boshqasi emas”, degan edi u.
Bunday mahsulotlarga asosan kiyim-kechak, dori vositalari, parfyumeriya mahsulotlari, zargarlik buyumlari, maishiy texnika va tamaki mahsulotlari kirishini qayd etgandi.
Izoh (0)