O‘zbekistonning Portugaliyaga yangi tayinlangan elchisi (qarorgohi Parijda joylashgan) Nodir G‘aniyev ushbu mamlakat prezidenti Marselu Rebelu de Souzaga ishonch yorliqlarini topshirdi, deb xabar bermoqda “Dunyo” axborot agentligi.
Qayd etilishicha, “Belem” saroyida bo‘lib o‘tgan rasmiy marosimdan so‘ng kechgan muloqot chog‘ida Portugaliya prezidenti ikki mamlakat o‘rtasidagi munosabatlar holati va istiqbollarini yuqori baholadi. Shuningdek, siyosiy, savdo-iqtisodiy, madaniy-gumanitar sohalarida hamkorlikni mustahkamlash masalalariga alohida e’tibor qaratildi.
O‘zbekiston va Portugaliya o‘rtasida diplomatik munosabatlar 1992-yil 12-avgustda o‘rnatilgan.
Nodir G‘aniyev bir vaqtning o‘zida O‘zbekistonning Fransiyadagi elchisi ham hisoblanadi. U 2024-yil 17-sentyabr kuni Fransiya prezidenti Emmanuel Makronga ishonch yorliqlarini topshirgandi. Undan avval O‘zbekistonning Shvetsiyadagi elchisi lavozimida ishlab kelgan.
Avvalgi elchi Sardor Rustamboyev 2018-yildan 2024-yilgacha Fransiya va Portugaliyada elchi lavozimida faoliyat yuritgan. 2024-yil yanvar oyida u Hindistonga elchi etib tayinlangan.
Izoh (0)