Toshkentda samolyot bortida yo‘lovchi ayolga shahvoniy shilqimlik qilgan erkak 3 sutkaga qamaldi.
“Daryo” tanishib chiqqan sud hujjatiga ko‘ra, mast holdagi 40 yoshli erkak 2025-yil 21-iyul kuni Toshkent xalqaro aeroportining uchib kelish yo‘nalishida Moskva—Toshkent reysi bilan uchib kelayotgan samolyotda o‘zi bilan bitta bortda ketayotgan yo‘lovchi ayol L.M.ga shahvoniy shilqimlik qilgan.
Ayol esa erkakka bu harakatlarni to‘xtatishni va o‘zini to‘g‘ri tutishi kerakligini aytishiga qaramasdan, u o‘z harakatlarini davom ettirib, shahvoniy xususiyatga ega bo‘lgan harakatlarni sodir etgani, ya’ni shahvoniy shilqimlik qilgani aniqlangan.
Erkakning bu harakatlarni sodir etganini sudda guvohlik bergan bortkuzatuvchi ham tasdiqlagan.
Sud majlisida erkak aybini tan olib, o‘sha kuni 3 bakal pivo ichgani sabab spirtli ichimlik ta’sirida bo‘lgani, parvoz vaqtida o‘zini bilmasdan ayolga shahvoniy shilqimlik qilganini, mast bo‘lgani uchun harakatlarining oqibatini tushunmaganini aytgan. Qilmishidan pushaymonligini, boshqa bu holat takrorlanmasligini, kechirim so‘raganini bayon qilib, unga nisbatan yengillik berishni so‘ragan.
Sud hukmi bilan unga Ma’muriy javobgarlik to‘g‘risidagi kodeksning 41-1-moddasi (shahvoniy shilqimlik qilish) 1-qismi bilan 3 sutka ma’muriy qamoq jazosi tayinlangan. Jazo tayinlashda qilmishidan chin ko‘ngildan pushaymonligi, huquqbuzarlik xususiyati, oilaviy ahvoli, aybdorlik darajasi, javobgarlikni yengillashtiruvchi va og‘irlashtiruvchi holatlar hisobga olingan.
Sud ma’muriy qamoqqa olingan shaxsni saqlash xarajatlaridan ham ozod qilishni lozim topgan.
Shahvoniy shilqimlik uchun kodeksda BHMning 2 baravaridan 5 baravarigacha miqdorda jarima yoki 5 sutkagacha ma’muriy qamoq jazosi belgilangan.
Izoh (0)