Toshkentda rossiyalik jurnalist Inessa Papernaya va yana ikki kishi vafot etgan mehmonxona egasi 8 yilga ozodlikdan mahrum etildi. Bu haqda “Daryo”ga Oliy sud matbuot xizmati xabar berdi.
Voqea 2024-yil oktyabrida yuz bergandi. Toshkentdagi Karaman Palace mehmonxonasida 47 yoshli rossiyalik jurnalist Inessa Papernaya va yana ikki nafar erkak vafot etgandi. Ularning o‘limi basseyn tozalangandan so‘ng mehmonxona ventilyatsiya tizimiga tushgan gazdan zaharlanishdan kelib chiqqani aytilgandi.
2025-yil 25-iyul kuni Toshkent shahar jinoyat ishlari bo‘yicha Yakkasaroy tuman sudi ochiq sud majlisida aybdorlarga nisbatan sud hukmi o‘qildi. Unga ko‘ra, mehmonxona egasi A.X. 8 yilga ozodlikdan mahrum etildi. Mehmonxonaga isitish qozonini sotgan ikki kishi va uni o‘rnatgan santexnik (Z.J., A.Y., N.Q.) 3 yilga ozodlikdan mahrum etildi.
Ularning barchasi Jinoyat kodeksining 186-moddasi 4-qismi “a” bandida (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish odamlar o‘limiga sabab bo‘lishi) nazarda tutilgan jinoyatni sodir etganlikda aybli deb topildi.
Halok bo‘lgan jurnalistning qonuniy vakili foydasiga 67 mln 588 ming so‘m undirish belgilandi. Vafot etgan yana Rossiya fuqarosi qonuniy vakillariga 60 million 688 ming so‘m undirilishi belgilandi.
Izoh (0)