Sirdaryo viloyati Sayxunobod tumanida quduqdagi gazdan zaharlanib uch kishi halok bo‘ldi. Bu haqda “Daryo”ga Bosh prokuratura matbuot kotibi Hayot Shamsutdinov ma’lum qildi.
Voqea 22-may kuni soat 18:30 atrofida sodir bo‘lgan. Tumanning “Do‘stlik” mahallasida yashovchi 67 yoshli erkak xonadonidagi sizot suvlarini saqlovchi 5 metrlik quduqni tozalash maqsadida tushgan. Biroq unda hosil bo‘lgan zaharli gazdan nafas olishi oqibatida halok bo‘lgan.
Uni qutqarish maqsadida quduqqa tushgan 39 yoshli o‘g‘li va 46 yoshli qo‘shnisi ham gazdan zaharlanib, vafot etgan. Ularni qutqarish uchun tushgan yana ikki kishi ham zaharli gazdan nafas olishi oqibatida sog‘lig‘i yomonlashib, hushini yo‘qotgan.
Sayxunobod tuman FVB xodimlari tomonidan ko‘rsatilgan yordam sababli ota, o‘g‘il va qo‘shnining murdasi hamda zaharli gazdan hushini yo‘qotgan ikki fuqaro quduqdan olib chiqilgan. Ko‘rsatilgan tibbiy yordam tufayli ularning hayoti saqlab qolingan va tuman tibbiyot birlashmasiga joylashtirilgan.
Ayni paytda holat yuzasidan Sayxunobod tuman prokuraturasi tomonidan tergovga qadar tekshiruv harakatlari olib borilmoqda.
Izoh (0)