“Mebel va yog‘ochsozlik sanoatining rivojlanishi uchun qulay shart-sharoitlar yaratishga oid qo‘shimcha chora-tadbirlar to‘g‘risida”gi prezident qarori qabul qilindi.
Qarorga ko‘ra, 2025–2028-yillarda mebel va yog‘ochsozlik sanoatini rivojlantirishning asosiy maqsadli ko‘rsatkichlari belgilandi, jumladan:
- mebel va yog‘ochsozlik mahsulotlari ishlab chiqarish hajmini 30 foizga oshirish;
- eksport hajmini 100 mln dollarga yetkazish;
- sohada 50 ming nafar aholini daromadli mehnat bilan ta’minlash.
2029-yil 1-yanvargacha qarorda belgilangan mebel ishlab chiqarishda foydalaniladigan 14 turdagi xomashyo, ehtiyot qismlar, furnitura va aksessuarlar importida bojxona boji 1 foiz stavkada qo‘llaniladi.
2025-yil 1-iyuldan o‘z xonadonida faoliyat yuritadigan YATTlarga mebel mahsulotlarini tayyorlash faoliyati bilan shug‘ullanish huquqi beriladi.
2025-yil 1-avgustdan mahalliy mebel texnologlari uchun rivojlangan xorijiy mamlakatlardagi nufuzli tashkilotlarning sohaga tegishli bo‘lgan malaka sertifikatlarini olish xarajatlarining 50 foizi qoplab beriladi.
Shavkat Mirziyoyev raisligida 26-may kuni o‘tkazilgan videoselektor yig‘ilishida O‘zbekistonda mebelsozlikni rivojlantirish bo‘yicha qator masalalar hal etilishi ma’lum qilingandi. Jumladan, yakka tartibdagi tadbirkorlarga 5 nafargacha ishchi olib, mebel ishlab chiqarishga ruxsat berilishi, bu faoliyatni boshlash, kengayish istagida yurgan yosh tadbirkorlarga 7 yilga 5 milliard so‘mgacha 18 foizli kredit ajratilishi aytildi.
Ishlab chiqaruvchilar tannarxni pasaytirish uchun furnitura, aksessuar, bo‘yoq, kley, DSP kabi xomashyoga bojni kamaytirishni so‘ragan. Prezident milliy mahsulotlar raqobatbardosh bo‘lishi uchun bunga rozilik berdi. Mutasaddilarga 14 turdagi xomashyo, furnitura, aksessuar uchun 3 yil muddatga import bojini 1 foiz etib belgilash bo‘yicha qaror loyihasini kiritish topshirildi. Mebel uchun yog‘och va yog‘och materiallarini markazlashgan holda olib kelish yo‘lga qo‘yiladi.
Izoh (0)